meri chashm-e-surmagin se na nigah-e-dil-nashin se

merī chashm-e-surmagīñ se na nigāh-e-dil-nashīñ se

ye falak meñ larzisheñ haiñ mirī āh-e-ātishīñ se

na surūr-e-sālihīñ se na nishāt-e-kāmilīñ se

mirī ruuh mutma.in hai tirī zulf-e-’ambarīñ hai

maiñ junūñ meñ kah rahā thā shab-e-hijr kā fasāna

kabhī kahte-kahte bhūlā kabhī kah uThā kahīñ se

dar-e-yār par marūñgā ye maiñ kah chukā huuñ zāhid

mirī ziist hai ’ibārat usī paak sarzamīñ se

ye junūn-e-'ishq kyā hai ye faroġh-e-husn-e-barham

ki nuqūsh-e-kilk-e-qudrat ubhar aa.e haiñ jabīñ se

ye 'ra.ūf' kah rahā hai vo ḳhudāyā ḳhair se hoñ

na koī payām aayā na to ḳhat likhā kahīñ se

meri chashm-e-surmagin se na nigah-e-dil-nashin se

ye falak mein larzishen hain meri aah-e-atishin se

na surur-e-salihin se na nishat-e-kaamilin se

meri ruh mutmain hai teri zulf-e-’ambarin hai

main junun mein kah raha tha shab-e-hijr ka fasana

kabhi kahte-kahte bhula kabhi kah uTha kahin se

dar-e-yar par marunga ye main kah chuka hun zahid

meri zist hai ’ibarat usi pak sarzamin se

ye junun-e-'ishq kya hai ye farogh-e-husn-e-barham

ki nuqush-e-kilk-e-qudrat ubhar aae hain jabin se

ye 'rauf' kah raha hai wo KHudaya KHair se hon

na koi payam aaya na to KHat likha kahin se