jise ho ishq-e-kaamil yar tera

jise ho 'ishq-e-kāmil yaar terā

to be-shak ho use dīdār terā

jo farmāyā hai tuune nahnu-aqrab

nahīñ miltā pata kyuuñ yaar terā

masīhā naza.a kā vaqt aa paḌā hai

ḳhabar le mar chalā bīmār terā

laraztā aur Dartā ḳhauf se huuñ

ḳhudāyā naam hai qahhār terā

tū jab lā-taqnitū farmā chukā hai

bharosa hai hameñ ġhaffār terā

na kyuuñ bandoñ kī hove parda-poshī

ilāhī naam hai sattār terā

kabhī majnūñ banā ḳhud gāh-e-lailā

na paayā bhed ham ne yaar terā

anal-haq kah diyā mansūr ban kar

ki guzrā jaan se sarshār terā

jilāyā shams ne qum kah ke murda

ye kyā jaane koī asrār terā

gire ġhash khā ke jo muusā ne dekhā

vo jalva tuur par ai yaar terā

farishte 'arsh-e-a.alā bhuul jaa.eñ

kabhī gar dekh leñ darbār terā

tirī furqat meñ hai ye 'abr' muztar

muyassar ho kahīñ dīdār terā

jise ho 'ishq-e-kaamil yar tera

to be-shak ho use didar tera

jo farmaya hai tune nahnu-aqrab

nahin milta pata kyun yar tera

masiha naza ka waqt aa paDa hai

KHabar le mar chala bimar tera

larazta aur Darta KHauf se hun

KHudaya nam hai qahhaar tera

tu jab la-taqnitu farma chuka hai

bharosa hai hamein ghaffar tera

na kyun bandon ki howe parda-poshi

ilahi nam hai sattar tera

kabhi majnun bana KHud gah-e-laila

na paya bhed hum ne yar tera

anal-haq kah diya mansur ban kar

ki guzra jaan se sarshaar tera

jilaya shams ne qum kah ke murda

ye kya jaane koi asrar tera

gire ghash kha ke jo musa ne dekha

wo jalwa tur par ai yar tera

farishte 'arsh-e-ala bhul jaen

kabhi gar dekh len darbar tera

teri furqat mein hai ye 'abr' muztar

muyassar ho kahin didar tera