nahin raaz-e-dil hai batane ke qabil

nahīñ rāz-e-dil hai batāne ke qābil

kahāñ ye fasāna sunāne ke qābil

na pūchho koī farq ahmad ahad kā

bhalā bhed hai ye batāne ke qābil

'ajab man ’araf kā hai ye ganj-e-maḳhfī

ye daulat nahīñ hai luTāne ke qābil

anal-haq to mansūr ne haq kahā thā

na thā daar par vo chaḌhāne ke qābil

jo pesh aanī hai pesh aa.egī ik din

navishta nahīñ ye miTāne ke qābil

nasīhat jo maano to hai 'arz itnī

zamāna nahīñ dil lagāne ke qābil

jo dil par guzartī hai ham jānte haiñ

nahīñ hai kisī ko batāne ke qābil

bulātā hai ḳhāliq mujhe 'uzr kyā hai

zarā maiñ bhī ho luuñ to jaane ke qābil

are o ajal haT sirhāne se mere

kahāñ jā.ūñ hai muñh dikhāne ke qābil

hai bhārī janāza jo baar gunā se

uThe kyā nahīñ hai uThāne ke qābil

bulāte nahīñ dar pe hazrat jo mujh ko

ye sar hī nahīñ āstāne ke qābil

gunahgār huuñ par huuñ shaidā tumhārā

bulā lo agar huuñ bulāne ke qābil

kaleja tire 'abr' kā kyā sipar hai

nahīñ tiir ġham ke nishāne ke qābil

nahin raaz-e-dil hai batane ke qabil

kahan ye fasana sunane ke qabil

na puchho koi farq ahmad ahad ka

bhala bhed hai ye batane ke qabil

'ajab man ’araf ka hai ye ganj-e-maKHfi

ye daulat nahin hai luTane ke qabil

anal-haq to mansur ne haq kaha tha

na tha dar par wo chaDhane ke qabil

jo pesh aani hai pesh aaegi ek din

nawishta nahin ye miTane ke qabil

nasihat jo mano to hai 'arz itni

zamana nahin dil lagane ke qabil

jo dil par guzarti hai hum jaante hain

nahin hai kisi ko batane ke qabil

bulata hai KHaliq mujhe 'uzr kya hai

zara main bhi ho lun to jaane ke qabil

are o ajal haT sirhane se mere

kahan jaun hai munh dikhane ke qabil

hai bhaari janaza jo bar guna se

uThe kya nahin hai uThane ke qabil

bulate nahin dar pe hazrat jo mujh ko

ye sar hi nahin aastane ke qabil

gunahgar hun par hun shaida tumhaara

bula lo agar hun bulane ke qabil

kaleja tere 'abr' ka kya sipar hai

nahin tir gham ke nishane ke qabil