sharab-e-shauq ka mastana hun main

sharāb-e-shauq kā mastāna huuñ maiñ

are saaqī tirā dīvāna huuñ meñ

ḳhayāl-e-yār meñ misl-e-zuleḳhā

asīr-e-gesū-e-jānāna huuñ maiñ

kisī kī justujū meñ kho gayā huuñ

'azīzoñ se bhī ab begāna huuñ maiñ

nazar aatā nahīñ juz yaar mujh ko

jamāl-e-yār kā dīvāna huuñ maiñ

sanam dil meñ mire maskan-guzīñ hai

but-e-be-pīr kā but-ḳhāna huuñ maiñ

nigāhoñ meñ vo but dil meñ ḳhudā hai

kabhī masjid kabhī but-ḳhāna huuñ maiñ

dil-o-jāñ se sanam par maiñ fidā huuñ

sham' hai yaar to parvāna huuñ maiñ

falātūñ ho na kyuuñ kar merā qātil

ki rāh-e-'ishq meñ farzāna huuñ maiñ

havā-e-gulshan-e-rizvān se kyā kaam

jamāl-e-yār kā parvāna huuñ maiñ

firāq-e-yār meñ majnūñ banā huuñ

misāl-e-āhu-e-vīrāna huuñ maiñ

kaḌī jhelī hai kyā-kyā maiñ ne ai 'abr'

usī par naaz hai mardāna huuñ maiñ

sharab-e-shauq ka mastana hun main

are saqi tera diwana hun mein

KHayal-e-yar mein misl-e-zuleKHa

asir-e-gesu-e-jaanana hun main

kisi ki justuju mein kho gaya hun

'azizon se bhi ab begana hun main

nazar aata nahin juz yar mujh ko

jamal-e-yar ka diwana hun main

sanam dil mein mere maskan-guzin hai

but-e-be-pir ka but-KHana hun main

nigahon mein wo but dil mein KHuda hai

kabhi masjid kabhi but-KHana hun main

dil-o-jaan se sanam par main fida hun

sham' hai yar to parwana hun main

falatun ho na kyun kar mera qatil

ki rah-e-'ishq mein farzana hun main

hawa-e-gulshan-e-rizwan se kya kaam

jamal-e-yar ka parwana hun main

firaq-e-yar mein majnun bana hun

misal-e-ahu-e-virana hun main

kaDi jheli hai kya-kya main ne ai 'abr'

usi par naz hai mardana hun main