شرابِ شوق کا مستانہ ہوں میں

شرابِ شوق کا مستانہ ہوں میں

ارے ساقی ترا دیوانہ ہوں میں

خیالِ یار میں مثلِ زلیخا

اسیرِ گیسوئے جانانہ ہوں میں

کسی کی جستجو میں کھو گیا ہوں

عزیزوں سے بھی اب بیگانہ ہوں میں

نظر آتا نہیں جز یار مجھ کو

جمالِ یار کا دیوانہ ہوں میں

صنم دل میں مرے مسکن گزیں ہے

بتِ بے پیر کا بت خانہ ہوں میں

نگاہوں میں وہ بت دل میں خدا ہے

کبھی مسجد کبھی بت خانہ ہوں میں

دل وجاں سے صنم پر میں فدا ہوں

شمع ہے یار تو پروانہ ہوں میں

فلاطوں ہو نہ کیوں کر میرا قاتل

کہ راہِ عشق میں فرزانہ ہوں میں

ہوائے گلشنِ رضوان سے کیا کام

جمال یار کا پروانہ ہوں میں

فراقِ یار میں مجنوں بنا ہوں

مثالِ آہوئے ویرانہ ہوں میں

کڑی جھیلی ہے کیا کیا میں نے اے ابرؔ

اسی پر ناز ہے مردانہ ہوں میں