dariya se hui qatre ko nida tu aur nahin main aur nahin

dariyā se huī qatre ko nidā tū aur nahīñ maiñ aur nahīñ

tū mauj meñ mere habāb banā tū aur nahīñ maiñ aur nahīñ

ḳhāliq ne kahā mahbūb-e-ḳhudā tū aur nahīñ maiñ aur nahīñ

tū nuur se mere huā paidā tū aur nahīñ maiñ aur nahīñ

kar nuur se nuur ko tere judā kyā nūrun-'alā vo nuur banā

ai nūr-e-ḳhudā ai nūr-e-ḳhudā tū aur nahīñ maiñ aur nahīñ

kahīñ muusā banā kahīñ tuur banā kahīñ 'iisā banā kahīñ nuur banā

qudrat ne tirī kyā kyā na kiyā tū aur nahīñ maiñ aur nahīñ

ahmad-o-ahad meñ ġhaur-talab hai miim kā us meñ ek sabab

de parda-e-mīm ko ruḳh se uThā tū aur nahīñ maiñ aur nahīñ

guftār-e-nabī hai kalām-e-ḳhudā raftār-e-nabī asrār-e-ḳhudā

ye shaan nabī hai shaan ḳhudā to aur nahīñ meñ aur nahīñ

me'arāj kī shab yuuñ rab ne kahā mahbūb mire nazdīk to aa

yahāñ parda hai kyā merā terā tū aur nahīñ maiñ aur nahīñ

maiñ terā valī tū vasī hai mirā ek jān-o-do-qālib go Thahrā

hazrat ne kahā ai sher-e-ḳhudā tū aur nahīñ maiñ aur nahīñ

mansūr anal-haq bol uThā ye 'ishq hai mar ke ḳhudā se milā

jab daar chaḌhā aa.ī ye sadā tū aur nahīñ maiñ aur nahīñ

sarmad ko jo nashsha-e-'ishq huā sar apnā kaTāyā na uff kiyā

sar tan se kaTā jab bol uThā tū aur nahīñ maiñ aur nahīñ

nashtar jo rag-e-lailā meñ huā vahāñ qais bichāre kā ḳhuun bahā

hai jazba-e-ishq maiñ kahtā rahā tū aur nahīñ maiñ aur nahīñ

diyā nār-e-ḳhalīl ik dam meñ bujhā tirī rahmat-e-'abr' se nuuh bachā

ki ḳhudā ne kahā lau-lāka-lammā tū aur nahīñ maiñ aur nahīñ

huuñ murīd tirā tu hai piir mirā vahāñ qalb hilā yahāñ dard huā

kabhī 'abr' ko itnā bhī na kahā tū aur nahīñ maiñ aur nahīñ

dariya se hui qatre ko nida tu aur nahin main aur nahin

tu mauj mein mere habab bana tu aur nahin main aur nahin

KHaliq ne kaha mahbub-e-KHuda tu aur nahin main aur nahin

tu nur se mere hua paida tu aur nahin main aur nahin

kar nur se nur ko tere juda kya nurun-'ala wo nur bana

ai nur-e-KHuda ai nur-e-KHuda tu aur nahin main aur nahin

kahin musa bana kahin tur bana kahin 'isa bana kahin nur bana

qudrat ne teri kya kya na kiya tu aur nahin main aur nahin

ahmad-o-ahad mein ghaur-talab hai mim ka us mein ek sabab

de parda-e-mim ko ruKH se uTha tu aur nahin main aur nahin

guftar-e-nabi hai kalam-e-KHuda raftar-e-nabi asrar-e-KHuda

ye shan nabi hai shan KHuda to aur nahin mein aur nahin

me'araj ki shab yun rab ne kaha mahbub mere nazdik to aa

yahan parda hai kya mera tera tu aur nahin main aur nahin

main tera wali tu wasi hai mera ek jaan-o-do-qalib go Thahra

hazrat ne kaha ai sher-e-KHuda tu aur nahin main aur nahin

mansur anal-haq bol uTha ye 'ishq hai mar ke KHuda se mila

jab dar chaDha aai ye sada tu aur nahin main aur nahin

sarmad ko jo nashsha-e-'ishq hua sar apna kaTaya na uff kiya

sar tan se kaTa jab bol uTha tu aur nahin main aur nahin

nashtar jo rag-e-laila mein hua wahan qais bichaare ka KHun baha

hai jazba-e-ishq main kahta raha tu aur nahin main aur nahin

diya nar-e-KHalil ek dam mein bujha teri rahmat-e-'abr' se nuh bacha

ki KHuda ne kaha lau-laka-lamma tu aur nahin main aur nahin

hun murid tera tu hai pir mera wahan qalb hila yahan dard hua

kabhi 'abr' ko itna bhi na kaha tu aur nahin main aur nahin