دریا سے ہوئی قطرے کو ندا تو اور نہیں میں اور نہیں

دریا سے ہوئی قطرے کو ندا تو اور نہیں میں اور نہیں

تو موج میں میرے حباب بنا تو اور نہیں میں اور نہیں

خالق نے کہا محبوب خدا تو اور نہیں میں اور نہیں

تو نور سے میرے ہوا پیدا تو اور نہیں میں اور نہیں

کر نور سے نور کو تیرے جدا کیا نور علیٰ وہ نور بنا

اے نورِ خدا اے نور خدا تو اور نہیں میں اور نہیں

کہیں موسٰی بنا کہیں طور بنا کہیں عیسیٰ بنا کہیں نور بنا

قدرت نے تری کیا کیا نہ کیا تو اور نہیں میں اور نہیں

احمد واحد میں غور طلب ہے میم کا اُس میں ایک سبب

دے پردۂ میم کو رخ سے اٹھا تو اور نہیں میں اور نہیں

گفتار نبی ہے کلامِ خدا رفتار نبی اسرار خدا

یہ شانِ نبی ہے شان خدا تو اور نہیں میں اور نہیں

معراج کی شب یوں رب نے کہا محبوب مرے نزدیک تو آ

یہاں پردہ ہے کیا میرا تیرا تو اور نہیں میں اور نہیں

میں تیرا ولی تو وصی ہے مرا ایک جان و دو قالب گو ٹھہرا

حضرت نے کہا اے شیرِ خدا تو اور نہیں میں اور نہیں

منصور انا الحق بول اٹھا یہ عشق ہے مر کے خدا سے ملا

جب دار چڑھا آئی یہ صدا تو اور نہیں میں اور نہیں

سرمد کو جو نشۂ عشق ہوا سر اپنا کٹا یا نہ اُف کیا

سر تن سے کٹا جب بول اٹھا تو اور نہیں میں اور نہیں

نشتر جو رگ لیلیٰ میں ہوا وہاں قیس بچارے کا خون بہا

ہے جذبۂ عشق میں کہتا رہا تو اور نہیں میں اور نہیں

دیا نارِ خلیل اک دم میں بجھا تری رحمت ابرؔ سے نوح بچا

کہ خدا نے کہا لو لاک لما تو اور نہیں میں اور نہیں

ہوں مرید ترا تو ہے پیر مرا وہاں قلب ہلا یہاں درد ہوا

کبھی ابرؔ کو اتنا بھی نہ کہا تو اور نہیں میں اور نہیں