ajib karb sa dil mein basae rakha hai

ajiib karb sā dil meñ basā.e rakhā hai

kisī kī yaad se dil ko sajā.e rakhā hai

sabhī ne oḌh rakhī hai munāfiqat kī ridā

tamām shahar ne chehrā chhupā.e rakhā hai

vafā kā dard hai aisā ki jaise koh-e-girāñ

shab-e-firāq meñ dariyā bahā.e rakhā hai

namāz shauq-e-vasīla hai sirf milne kā

vuzū ke saath hī sar ko jhukā.e rakhā hai

tujhe to bhūlnā mumkin nahii. thā mere liye

so ek sho.ala sā dil meñ jalā.e rakhā hai

junūn-e-ishq meñ apnā patā nahii. 'balkHī'

tirī hī diid pe sab ko bhulā.e rakhā hai

ajib karb sa dil mein basae rakha hai

kisi ki yaad se dil ko sajae rakha hai

sabhi ne oDh rakhi hai munafiqat ki rida

tamam shahar ne chehra chhupae rakha hai

wafa ka dard hai aisa ki jaise koh-e-giran

shab-e-firaq mein dariya bahae rakha hai

namaz shauq-e-wasila hai sirf milne ka

wuzu ke sath hi sar ko jhukae rakha hai

tujhe to bhulna mumkin nahi tha mere liye

so ek shoala sa dil mein jalae rakha hai

junun-e-ishq mein apna pata nahi 'balkHi'

teri hi did pe sab ko bhulae rakha hai