raaz aashna-e-dida-e-bina na ho saka

raaz āshnā-e-dīda-e-bīna na ho sakā

haa.e vo bad-nasīb jo terā na ho sakā

mujh ko diyā gayā hai ba-sad e’timād-o-nāz

vo ġham jo do-jahāñ ko gavārā na ho sakā

shān-e-'atā-e-dost pe qurbān jā.iye

vo ġham diyā ki jis kā mudāvā na ho sakā

us kā dimāġh us kā tamannā zahe-nasīb

tere sivā jo aur kisī kā na ho sakā

aa.e vo tere sāmne kitne badal ke ruup

apnī nazar pe tujh ko bharosa na ho sakā

vo muntazir rahe ki ye chāhe sukūn-e-dard

ham kyā kareñ ki ham ko gavārā na ho sakā

har chand dī na daad kisī ne magar 'adīb'

tark-e-ḳhulūs ham se na hogā na ho sakā

raaz aashna-e-dida-e-bina na ho saka

hae wo bad-nasib jo tera na ho saka

mujh ko diya gaya hai ba-sad e’timad-o-naz

wo gham jo do-jahan ko gawara na ho saka

shan-e-'ata-e-dost pe qurban jaiye

wo gham diya ki jis ka mudawa na ho saka

us ka dimagh us ka tamanna zahe-nasib

tere siwa jo aur kisi ka na ho saka

aae wo tere samne kitne badal ke rup

apni nazar pe tujh ko bharosa na ho saka

wo muntazir rahe ki ye chahe sukun-e-dard

hum kya karen ki hum ko gawara na ho saka

har chand di na dad kisi ne magar 'adib'

tark-e-KHulus hum se na hoga na ho saka