راز آشنائے دیدۂ بینا نہ ہو سکا

راز آشنائے دیدۂ بینا نہ ہو سکا

ہائے وہ بد نصیب جو تیرا نہ ہو سکا

مجھ کو دیا گیا ہے بصد اعتماد و ناز

وہ غم جو دو جہاں کو گوارا نہ ہو سکا

شان عطائے دوست پہ قربان جائیے

وہ غم دیا کہ جس کا مداوا نہ ہو سکا

اس کا دماغ اس کا تمنا زہے نصیب

تیرے سوا جو اور کسی کا نہ ہو سکا

آئے وہ تیرے سامنے کتنے بدل کے روپ

اپنی نظر پہ تجھ کو بھروسہ نہ ہو سکا

وہ منتظر رہے کہ یہ چاہے سکون درد

ہم کیا کریں کہ ہم کو گوارا نہ ہو سکا

ہر چند دی نہ داد کسی نے مگر ادیبؔ

ترک خلوص ہم سے نہ ہوگا نہ ہو سکا