ماورا ہیں دوست مہر و ماہ کی منزل سے ہم

ماورا ہیں دوست مہر و ماہ کی منزل سے ہم

دہر پر کھلتے تو ہیں لیکن بڑی مشکل سے ہم

دیدنی تھے چشمِ ساقی کے اشارے ہائے ہائے

بے پئے ہی اٹھ گئے اکثر بھری محفل سے ہم

وہ تو کہیے عشق کی فطرت نہیں آسودگی

ورنہ سو سو بار گزرے ہیں اسی منزل سے ہم

کیا بتائیں اضطرابِ خود گرفتاری کا حال

لمحہ بھر آزاد رہتے ہیں بڑی مشکل سے ہم

وقت کے رحم و کرم پر چل رہے ہیں اے ادیبؔ

راہبر سے بے خبر نا آشنا، منزل سے ہم