ishq pe etimad kar husn ki be-ruKHi na dekh

'ishq pe e'timād kar husn kī be-ruḳhī na dekh

dil ke muāmlāt meñ ġham pe na jā ḳhushī na dekh

fikr-e-bahisht chhoḌ kar dāna-o-dām se guzar

mansab-e-bandagī samajh maqsad-e-bandagī na dekh

dil ko adab sikhā.e jā kuchh bhī ho muskurā.e jā

tīr-e-nigāh-e-nāz kā zaḳhm ghaḌī ghaḌī na dekh

laakh hakīm miT ga.e par na ye zaḳhm bhar sake

lutf-e-shaguftagī uThā rañg-e-shikastagī na dekh

husn-e-azal se pūchhnā 'ishq kī jur.atoñ kā haal

uTh hī ga.ī nigāh-e-shauq kahte rahe sabhī na dekh

dil kī lagī meñ zabt-e-ġham khel nahīñ hai ai 'adīb'

kasrat-e-ġham se haar kar tū ne bhī aah kī na dekh

'ishq pe e'timad kar husn ki be-ruKHi na dekh

dil ke muamlat mein gham pe na ja KHushi na dekh

fikr-e-bahisht chhoD kar dana-o-dam se guzar

mansab-e-bandagi samajh maqsad-e-bandagi na dekh

dil ko adab sikhae ja kuchh bhi ho muskurae ja

tir-e-nigah-e-naz ka zaKHm ghaDi ghaDi na dekh

lakh hakim miT gae par na ye zaKHm bhar sake

lutf-e-shaguftagi uTha rang-e-shikastagi na dekh

husn-e-azal se puchhna 'ishq ki juraton ka haal

uTh hi gai nigah-e-shauq kahte rahe sabhi na dekh

dil ki lagi mein zabt-e-gham khel nahin hai ai 'adib'

kasrat-e-gham se haar kar tu ne bhi aah ki na dekh