jata kahan hai chhoD ke dard-e-jigar mujhe

jaatā kahāñ hai chhoḌ ke dard-e-jigar mujhe

mamnūn-e-iltifāt-e-masīhā na kar mujhe

dair-o-haram kī qaid se āzād kar mujhe

le chal jabīn-e-shauq dar-e-yār par mujhe

maiñ phir batā.ūñ qibla-e-qaunain kaun hai

taqdīr se mile jo tirā sañg-e-dar mujhe

nāz-e-sitam kā vāsta tujh ko sitam-shi.ār

hañsne na paa.eñ dekh ke zaḳhm-e-jigar mujhe

dil se kahīñ aziiz haiñ dil kī jarāhateñ

rahne de mere haal par ab chāra-gar mujhe

ahl-e-jafā ne phir na uThāyā jafā se haath

lazzat-shanās-e-zulm-o-sitam dekh kar mujhe

behoshiyoñ kā naam thā asrār-e-ma.arifat

kyūñkar harīm-e-nāz kī hotī ḳhabar mujhe

ai ham-navā ināyat-e-sayyād kyā kahūñ

zālim ne sab asīroñ ko chhoḌā magar mujhe

aksar palaT ga.ī hai shab-e-intizār maut

marne na dard-e-dil ne diyā tā-sahar mujhe

ahl-e-niyāz-e-dahr se arz-e-niyāz-e-dil

is vus.at-e-nazar ne kiyā dar-ba-dar mujhe

muddat huī ki barq ne phūñkā thā āshiyāñ

ab tak nasheman aatā hai jaltā nazar mujhe

añgḌā.iyoñ ne khīñch lī saare badan kī ruuh

ab mai ke badle chāhiye jān-e-digar mujhe

aib-o-hunar ko dekhtā 'afqar' jo sāth-sāth

aisā milā na ek bhī ahl-e-hunar mujhe

jata kahan hai chhoD ke dard-e-jigar mujhe

mamnun-e-iltifat-e-masiha na kar mujhe

dair-o-haram ki qaid se aazad kar mujhe

le chal jabin-e-shauq dar-e-yar par mujhe

main phir bataun qibla-e-qaunain kaun hai

taqdir se mile jo tera sang-e-dar mujhe

naz-e-sitam ka wasta tujh ko sitam-shiar

hansne na paen dekh ke zaKHm-e-jigar mujhe

dil se kahin aziz hain dil ki jarahaten

rahne de mere haal par ab chaara-gar mujhe

ahl-e-jafa ne phir na uThaya jafa se hath

lazzat-shanas-e-zulm-o-sitam dekh kar mujhe

behoshiyon ka nam tha asrar-e-marifat

kyunkar harim-e-naz ki hoti KHabar mujhe

ai ham-nawa inayat-e-sayyaad kya kahun

zalim ne sab asiron ko chhoDa magar mujhe

aksar palaT gai hai shab-e-intizar maut

marne na dard-e-dil ne diya ta-sahar mujhe

ahl-e-niyaz-e-dahr se arz-e-niyaz-e-dil

is wusat-e-nazar ne kiya dar-ba-dar mujhe

muddat hui ki barq ne phunka tha aashiyan

ab tak nasheman aata hai jalta nazar mujhe

angDaiyon ne khinch li sare badan ki ruh

ab mai ke badle chahiye jaan-e-digar mujhe

aib-o-hunar ko dekhta 'afqar' jo sath-sath

aisa mila na ek bhi ahl-e-hunar mujhe