junun ko ab junun-e-fitna-saman kar ke chhoDunga

junūñ ko ab junūn-e-fitna-sāmāñ kar ke chhoḌūñgā

had-e-dāman ko tā-hadd-e-garebāñ kar ke chhoḌūñgā

tire ġham ko sukūn-e-ḳhātir-e-jāñ kar ke chhoḌūñgā

maiñ dard-e-dil ko dard-e-dil kā darmāñ kar ke chhoḌūñgā

rahī un ke tabassum kī agar yuuñ hī namak-pāshī

to har zaḳhm-e-jigar ko maiñ namakdāñ kar ke chhoḌūñgā

nahīñ mauqūf duniyā hī meñ charchā ḳhūn-e-nāhaq kā

sar-e-mahshar bhī qātil ko pashemāñ kar ke chhoḌūñgā

asīrī meñ nahīñ hāsil ho sair-e-gulsitāñ mujh ko

qafas ko ashk-e-rañgīñ se gulistāñ kar ke chhoḌūñgā

na rahne dūñgā dil meñ koī hasrat zauq-e-hirmāñ se

maiñ apne is bhare ghar ko bayābāñ kar ke chhoḌūñgā

salāmat hai agar josh-e-junūñ to ek din 'afqar'

bahār-e-bazm-e-hastī ko bayābāñ kar ke chhoḌūñgā

junun ko ab junun-e-fitna-saman kar ke chhoDunga

had-e-daman ko ta-hadd-e-gareban kar ke chhoDunga

tere gham ko sukun-e-KHatir-e-jaan kar ke chhoDunga

main dard-e-dil ko dard-e-dil ka darman kar ke chhoDunga

rahi un ke tabassum ki agar yun hi namak-pashi

to har zaKHm-e-jigar ko main namakdan kar ke chhoDunga

nahin mauquf duniya hi mein charcha KHun-e-nahaq ka

sar-e-mahshar bhi qatil ko pasheman kar ke chhoDunga

asiri mein nahin hasil ho sair-e-gulsitan mujh ko

qafas ko ashk-e-rangin se gulistan kar ke chhoDunga

na rahne dunga dil mein koi hasrat zauq-e-hirman se

main apne is bhare ghar ko bayaban kar ke chhoDunga

salamat hai agar josh-e-junun to ek din 'afqar'

bahaar-e-bazm-e-hasti ko bayaban kar ke chhoDunga