kyun na KHush hun maut aai mujhko manzil ke qarib

kyuuñ na ḳhush huuñ maut aa.ī mujh ko manzil ke qarīb

jaan parvāna kī niklī sham.a-e-mahfil ke qarīb

pūchhne vaale mire hāl-e-pareshāñ ko na pūchh

ho rahā hai dard sā mahsūs ab dil ke qarīb

kar diyā vārafta kuchh aisā vufūr-e-shauq ne

bār-hā aa.e palaT ham jā ke manzil ke qarīb

vo jo thī ik husn kī sūrat kabhī dūr-az-nigāh

aa ga.ī hai rafta rafta ab mire dil ke qarīb

us kī nākāmī-e-qismat par kahāñ tak roiye

ġharq ho jaa.e safīna jis kā sāhil ke qarīb

dil kī duniyā lūTne vaale unheñ bhī luuT le

ro rahī haiñ hasrateñ jo ḳhāna-e-dil ke qarīb

dar-haqīqat ho rahā thā itnā sāhil duur duur

ho rahe the ham ba-zāhir jitne sāhil ke qarīb

shab kī tanhā.ī meñ bāteñ kar rahā huuñ is tarah

jaise baiThā hī to hai koī mire dil ke qarīb

haaye kis aalam meñ tū ne zindagī dhokā diyā

dūr-az-yār-o-vatan ġhurbat kī manzil ke qarīb

merā marnā yā ki jiinā jo bhī 'afqar' ho magar

ho kisī ke āstān-e-ka.aba manzil ke qarīb

kyun na KHush hun maut aai mujh ko manzil ke qarib

jaan parwana ki nikli shama-e-mahfil ke qarib

puchhne wale mere haal-e-pareshan ko na puchh

ho raha hai dard sa mahsus ab dil ke qarib

kar diya warafta kuchh aisa wufur-e-shauq ne

bar-ha aae palaT hum ja ke manzil ke qarib

wo jo thi ek husn ki surat kabhi dur-az-nigah

aa gai hai rafta rafta ab mere dil ke qarib

us ki nakaami-e-qismat par kahan tak roiye

gharq ho jae safina jis ka sahil ke qarib

dil ki duniya luTne wale unhen bhi luT le

ro rahi hain hasraten jo KHana-e-dil ke qarib

dar-haqiqat ho raha tha itna sahil dur dur

ho rahe the hum ba-zahir jitne sahil ke qarib

shab ki tanhai mein baaten kar raha hun is tarah

jaise baiTha hi to hai koi mere dil ke qarib

haye kis aalam mein tu ne zindagi dhoka diya

dur-az-yar-o-watan ghurbat ki manzil ke qarib

mera marna ya ki jina jo bhi 'afqar' ho magar

ho kisi ke aastan-e-kaba manzil ke qarib