makan chhoD kar la-makan dekhte hain

makāñ chhoḌ kar lā-makāñ dekhte haiñ

kahāñ vo haiñ aur ham kahāñ dekhte haiñ

ta.ayyun kā har āstāñ dekhte haiñ

jahāñ tum nahīñ ham vahāñ dekhte haiñ

uThā lete haiñ ham bhī do-chār tinke

jo bante koī āshiyāñ dekhte haiñ

qafas meñ asīroñ pe girtī hai bijlī

chaman se jo uThte dhuāñ dekhte haiñ

nahīñ dekhte kuchh magar ahl-e-mahshar

mujhe yā mirī dāstāñ dekhte haiñ

haqīqat meñ dair-o-haram ek haiñ jab

tujhe donoñ ke darmiyāñ dekhte haiñ

ye aaheñ haiñ merī ye naale haiñ mere

jinheñ āsmāñ āsmāñ dekhte haiñ

dar-e-yār hai phir dar-e-yār 'afqar'

jināñ ko ba-hadd-e-jināñ dekhte haiñ

makan chhoD kar la-makan dekhte hain

kahan wo hain aur hum kahan dekhte hain

tayyun ka har aastan dekhte hain

jahan tum nahin hum wahan dekhte hain

uTha lete hain hum bhi do-chaar tinke

jo bante koi aashiyan dekhte hain

qafas mein asiron pe girti hai bijli

chaman se jo uThte dhuan dekhte hain

nahin dekhte kuchh magar ahl-e-mahshar

mujhe ya meri dastan dekhte hain

haqiqat mein dair-o-haram ek hain jab

tujhe donon ke darmiyan dekhte hain

ye aahen hain meri ye nale hain mere

jinhen aasman aasman dekhte hain

dar-e-yar hai phir dar-e-yar 'afqar'

jinan ko ba-hadd-e-jinan dekhte hain