مکاں چھوڑ کر لا مکاں دیکھتے ہیں

مکاں چھوڑ کر لا مکاں دیکھتے ہیں

کہاں وہ ہیں اور ہم کہاں دیکھتے ہیں

تعین کا ہر آستاں دیکھتے ہیں

جہاں تم نہیں ہم وہاں دیکھتے ہیں

اٹھا لیتے ہیں ہم بھی دو چار تنکے

جو بنتے کوئی آشیاں دیکھتے ہیں

قفس میں اسیروں پہ گرتی ہے بجلی

چمن سے جو اٹھتے دھواں دیکھتے ہیں

نہیں دیکھتے کچھ مگر اہل محشر

مجھے یا مری داستاں دیکھتے ہیں

حقیقت میں دیر و حرم ایک ہیں جب

تجھے دونوں کے درمیاں دیکھتے ہیں

یہ آہیں ہیں میری یہ نالے ہیں میرے

جنہیں آسماں آسماں دیکھتے ہیں

در یار ہے پھر در یار افقرؔ

جناں کو بحد جناں دیکھتے ہیں