tere jalwon ki nairangi se chashm-e-shauq hairan hai

tire jalvoñ kī nairañgī se chashm-e-shauq hairāñ hai

kahīñ dariyā hai kuuza meñ kahīñ zarra bayābāñ hai

ḳhudā rakkhe ajab kaif-e-bahār-e-kū-e-jānāñ hai

ki dil hai jalva-sāmāñ to nazar jannat-ba-dāmāñ hai

badal le marne vaale ham se marg-e-nā-gahāñ apnī

tujhe jiine kī hasrat thī hameñ marne kā armāñ hai

ab us manzil pe pahuñchā hai kisī kā be-ḳhud-e-ulfat

jahāñ par zindagī-o-maut kā ehsās yaksāñ hai

mirī hastī dam-e-nazzāra haa.el hai nigāhoñ meñ

mirī hastī kā parda ḳhud hijāb-e-rū-e-jānāñ hai

na shart-e-zindagī koī na ta.a.īn-e-ajal koī

abhī zinda abhī murda ajab hastī-e-insāñ hai

ajab uljhan meñ Daalā tū ne ai dast-e-junūñ mujh ko

vo kahte haiñ ye dāman hai maiñ kahtā huuñ garebāñ hai

jināñ ko maiñ burā kahtā nahīñ lekin ye kahtā huuñ

jināñ vaa.iz jināñ hai kū-e-jānāñ kū-e-jānāñ hai

nazar rakh fazl-e-ḳhāliq par na ghabrā Dūbne vaale

isī dariyā meñ sāhil hai isī dariyā meñ tūfāñ hai

huī muddat girī thī charḳh se bijlī gulistāñ meñ

mirī nazroñ meñ lekin aaj tak jaltā gulistāñ hai

safīna dil kā kyā Duubā ki duniyā gum huī 'afqar'

na kashtī hai na dariyā hai na sāhil hai na tūfāñ hai

tere jalwon ki nairangi se chashm-e-shauq hairan hai

kahin dariya hai kuza mein kahin zarra bayaban hai

KHuda rakkhe ajab kaif-e-bahaar-e-ku-e-jaanan hai

ki dil hai jalwa-saman to nazar jannat-ba-daman hai

badal le marne wale hum se marg-e-na-gahan apni

tujhe jine ki hasrat thi hamein marne ka arman hai

ab us manzil pe pahuncha hai kisi ka be-KHud-e-ulfat

jahan par zindagi-o-maut ka ehsas yaksan hai

meri hasti dam-e-nazzara hael hai nigahon mein

meri hasti ka parda KHud hijab-e-ru-e-jaanan hai

na shart-e-zindagi koi na tain-e-ajal koi

abhi zinda abhi murda ajab hasti-e-insan hai

ajab uljhan mein Dala tu ne ai dast-e-junun mujh ko

wo kahte hain ye daman hai main kahta hun gareban hai

jinan ko main bura kahta nahin lekin ye kahta hun

jinan waiz jinan hai ku-e-jaanan ku-e-jaanan hai

nazar rakh fazl-e-KHaliq par na ghabra Dubne wale

isi dariya mein sahil hai isi dariya mein tufan hai

hui muddat giri thi charKH se bijli gulistan mein

meri nazron mein lekin aaj tak jalta gulistan hai

safina dil ka kya Duba ki duniya gum hui 'afqar'

na kashti hai na dariya hai na sahil hai na tufan hai