ترے جلووں کی نیرنگی سے چشم شوق حیراں ہے

ترے جلووں کی نیرنگی سے چشم شوق حیراں ہے

کہیں دریا ہے کوزہ میں کہیں ذرہ بیاباں ہے

خدا رکھے عجب کیف بہار کوئے جاناں ہے

کہ دل ہے جلوہ ساماں تو نظر جنت بہ داماں ہے

بدل لے مرنے والے ہم سے مرگ ناگہاں اپنی

تجھے جینے کی حسرت تھی ہمیں مرنے کا ارماں ہے

اب اس منزل پہ پہنچا ہے کسی کا بے خود الفت

جہاں پر زندگی و موت کا احساس یکساں ہے

مری ہستی دم نظارہ حائل ہے نگاہوں میں

مری ہستی کا پردہ خود حجاب روئے جاناں ہے

نہ شرط زندگی کوئی نہ تعیین اجل کوئی

ابھی زندہ ابھی مردہ عجب ہستیٔ انساں ہے

عجب الجھن میں ڈالا تو نے اے دست جنوں مجھ کو

وہ کہتے ہیں یہ دامن ہے میں کہتا ہوں گریباں ہے

جناں کو میں برا کہتا نہیں لیکن یہ کہتا ہوں

جناں واعظ جناں ہے کوئے جاناں کوئے جاناں ہے

نظر رکھ فضل خالق پر نہ گھبرا ڈوبنے والے

اسی دریا میں ساحل ہے اسی دریا میں طوفاں ہے

ہوئی مدت گری تھی چرخ سے بجلی گلستاں میں

مری نظروں میں لیکن آج تک جلتا گلستاں ہے

سفینہ دل کا کیا ڈوبا کہ دنیا گم ہوئی افقرؔ

نہ کشتی ہے نہ دریا ہے نہ ساحل ہے نہ طوفاں ہے