KHirad hai majbur aql hairan pata kahin hosh ka nahin hai

ḳhirad hai majbūr aql hairāñ pata kahīñ hosh kā nahīñ hai

abhī se aalam hai be-ḳhudī kā abhī to parda uThā nahīñ hai

hai vo bhī koī jabīn-e-sajda uThe tumhāre jo naqsh-e-pā se

na jazb kar le agar jabīñ ko tumhārā vo naqsh-e-pā nahīñ hai

nazar nazar ik nayā hai jalva nafas nafas ik na.ī hai duniyā

nigāh kī phir bhī intihā hai jamāl kī intihā nahīñ hai

huā ye ma.alūm ba.ad-muddat kisī kī nairañgī-e-sitam se

sitam b-andāza-e-adā hai adā ba-qadr-e-jafā nahīñ hai

azal se hai āsmāñ ḳhamīda na kar sakā phir bhī ek sajda

vo DhūñDhtā hai jis āstāñ ko vo āstāna milā nahīñ hai

hazār rañg-e-zamāna badle hazār daur-e-nashāt aa.e

jo bujh chukā hai havā-e-ġham se charāġh phir vo jalā nahīñ hai

mire nizām-e-hayāt meñ kuchh kamī sī mahsūs ho rahī hai

magar ho tum kis liye pareshāñ savāl dil kā uThā nahīñ hai

bahār aane kī aarzū kyā bahār ḳhud hai nazar kā dhokā

abhī chaman jannat-nazar hai abhī chaman kā patā nahīñ hai

ḳhushī hai zāhid kī varna saaqī ḳhayāl-e-tauba rahegā kab tak

ki terā rind-e-ḳharāb 'afqar' valī nahīñ pārsā nahīñ hai

KHirad hai majbur aql hairan pata kahin hosh ka nahin hai

abhi se aalam hai be-KHudi ka abhi to parda uTha nahin hai

hai wo bhi koi jabin-e-sajda uThe tumhaare jo naqsh-e-pa se

na jazb kar le agar jabin ko tumhaara wo naqsh-e-pa nahin hai

nazar nazar ek naya hai jalwa nafas nafas ek nai hai duniya

nigah ki phir bhi intiha hai jamal ki intiha nahin hai

hua ye malum baad-muddat kisi ki nairangi-e-sitam se

sitam b-andaza-e-ada hai ada ba-qadr-e-jafa nahin hai

azal se hai aasman KHamida na kar saka phir bhi ek sajda

wo DhunDhta hai jis aastan ko wo aastana mila nahin hai

hazar rang-e-zamana badle hazar daur-e-nashat aae

jo bujh chuka hai hawa-e-gham se charagh phir wo jala nahin hai

mere nizam-e-hayat mein kuchh kami si mahsus ho rahi hai

magar ho tum kis liye pareshan sawal dil ka uTha nahin hai

bahaar aane ki aarzu kya bahaar KHud hai nazar ka dhoka

abhi chaman jannat-nazar hai abhi chaman ka pata nahin hai

KHushi hai zahid ki warna saqi KHayal-e-tauba rahega kab tak

ki tera rind-e-KHarab 'afqar' wali nahin parsa nahin hai