nigahon ke markaz dilon ke sahaare tujhe kis tarah koi apna bana le

nigāhoñ ke markaz diloñ ke sahāre tujhe kis tarah koī apnā banā le

nazar-gāh-e-ālam tire ruḳh ke jalve merā zauq-e-nazzāra tere havāle

na dhokā de ai fursat-e-zindagāī fasāna mire ġham kā duniyā banā le

ajal se kah de marnā hai bar-haq abhī aur kuchh rose koī satā le

tumheñ zid ki ham kis liye pahle boleñ hameñ ki koī baat pahle nikāle

le bas aao mil jaa.eñ chhoḌeñ zidoñ ko na tum baat vaale na ham baat vaale

nazar aa.ī dhokā hī dhokā ye duniyā fareb-e-nazar hai tamāsha yahāñ kā

sunte haiñ bahut haq-parastoñ ke qisse bahut ham ne dekhe haiñ allāh vaale

hameñ mil gayā hai tirā āstāna kahīñ ab na aanā kahīñ ab na jaanā

muqaddar se bigḌā ho jis ke zamāna yahāñ apnī bigḌī vo qismat banā le

vo maḳhmūr āñkheñ vo pur-kaif nazreñ jise dekh leñ mast us ko banā deñ

na mai kī zarūrat na shīshe kī hājat kahāñ kī surāhī kahāñ ke pyāle

mohabbat kā duniyā meñ hai bol-bālā mohabbat na hotī to kuchh bhī na hotā

mohabbat kī bāteñ haiñ sab se anokhī mohabbat ke qisse haiñ sab se nirāle

barahman kā ho dharm yā dīn-e-mullā vahī ek jalva vahī ek sajda

ma.ābid pe be-kār 'afqar' hai jhagḌā kahāñ kī masājid kahāñ ke shivāle

nigahon ke markaz dilon ke sahaare tujhe kis tarah koi apna bana le

nazar-gah-e-alam tere ruKH ke jalwe mera zauq-e-nazzara tere hawale

na dhoka de ai fursat-e-zindagai fasana mere gham ka duniya bana le

ajal se kah de marna hai bar-haq abhi aur kuchh rose koi sata le

tumhein zid ki hum kis liye pahle bolen hamein ki koi baat pahle nikale

le bas aao mil jaen chhoDen zidon ko na tum baat wale na hum baat wale

nazar aai dhoka hi dhoka ye duniya fareb-e-nazar hai tamasha yahan ka

sunte hain bahut haq-paraston ke qisse bahut hum ne dekhe hain allah wale

hamein mil gaya hai tera aastana kahin ab na aana kahin ab na jaana

muqaddar se bigDa ho jis ke zamana yahan apni bigDi wo qismat bana le

wo maKHmur aankhen wo pur-kaif nazren jise dekh len mast us ko bana den

na mai ki zarurat na shishe ki hajat kahan ki surahi kahan ke pyale

mohabbat ka duniya mein hai bol-baala mohabbat na hoti to kuchh bhi na hota

mohabbat ki baaten hain sab se anokhi mohabbat ke qisse hain sab se nirale

barahman ka ho dharm ya din-e-mulla wahi ek jalwa wahi ek sajda

maabid pe be-kar 'afqar' hai jhagDa kahan ki masajid kahan ke shiwale