jidhar bhi saqi-e-mai-KHana aaya

jidhar bhī sāqī-e-mai-ḳhāna aayā

nazar raqs-e-mai-o-paimāna aayā

kabhī ka.aba kabhī but-ḳhāna aayā

sar-e-manzil dar-e-jānāna aayā

huā andaza-e-bāda-parastī

samajh meñ jab ḳhatt-e-paimāna aayā

hujūm-e-hashr hai mahv-e-tamāshā

ilāhī kis kā ye dīvāna aayā

mirī hastī kā parda sāmne thā

nazar jab jalva-e-jānāna aayā

ajab dīvāna thā dīvāna un kā

jise dekhā nazar dīvāna aayā

vahāñ bhī kar liyā sajda ḳhudā ko

koī jab raah meñ but-ḳhāna aayā

ma.āz-allāh nazā-e-dair-o-ka.aba

behamdillāh dar-e-mai-ḳhāna aayā

kareñ sajda mujhe sab ahl-e-mahshar

jo tum kah do mirā dīvāna aayā

jo shab ko rah gayā jalne se baaqī

huzūr-e-husn vo parvāna aayā

ġham-e-daurāñ kā phir kyā zikr 'afqar'

mai-e-rañgīñ kā jab paimāna aayā

jidhar bhi saqi-e-mai-KHana aaya

nazar raqs-e-mai-o-paimana aaya

kabhi kaba kabhi but-KHana aaya

sar-e-manzil dar-e-jaanana aaya

hua andaza-e-baada-parasti

samajh mein jab KHatt-e-paimana aaya

hujum-e-hashr hai mahw-e-tamasha

ilahi kis ka ye diwana aaya

meri hasti ka parda samne tha

nazar jab jalwa-e-jaanana aaya

ajab diwana tha diwana un ka

jise dekha nazar diwana aaya

wahan bhi kar liya sajda KHuda ko

koi jab rah mein but-KHana aaya

maaz-allah naza-e-dair-o-kaba

behamdillah dar-e-mai-KHana aaya

karen sajda mujhe sab ahl-e-mahshar

jo tum kah do mera diwana aaya

jo shab ko rah gaya jalne se baqi

huzur-e-husn wo parwana aaya

gham-e-dauran ka phir kya zikr 'afqar'

mai-e-rangin ka jab paimana aaya