kabhi chaar phul chaDha diye jo kisi ne mere mazar par

kabhī chaar phuul chaḌhā diye jo kisī ne mere mazār par

to hazāroñ charḳh se bijliyāñ girīñ ek musht-e-ġhubār par

vo matā-e-umr hai rā.egāñ jo na sarf ho dar-e-yār par

ki vo zindagī nahīñ zindagī jo basar ho roz-e-shumār par

na haram ke sajdoñ se vāsta na sujūd-e-dair se kuchh ġharaz

mujhe kaam hai dar-e-yār se mujhe naaz hai dar-e-yār par

maiñ hamesha vaqf-e-sitam rahā mujhe faḳhr hai mujhe naaz hai

kabhī apnī aisī hayāt par kabhī aise lail-o-nahār par

hai unhīñ kī zindagī zindagī hai unhīñ kī maut bhī maut jo

rahe āstāna-e-yār par miTe āstāna-e-yār par

vo bahār-e-umr ho yā ḳhizāñ nahīñ koī qābil-e-e'tinā

na yaqīñ thā mujh ko surūr par na hai e'tibār ḳhumār par

vo huuñ rind-e-mai-kada-nosh maiñ ki zarā bhī der agar huī

to sharāb shīsha meñ maujzan huī mere rañg-e-ḳhumār par

maiñ bhulā.ūñ kaise pas-e-fanā mirī zindagī kā hai āshnā

ki tamām rāhateñ umr kī huiiñ sadqe jab ġham-e-yār par

na ġhurūr aish-e-jahāñ pe kar na ġham-e-jahāñ se malūl ho

ki nizām-e-dahr nahīñ rahā kabhī 'afqar' ek madār par

kabhi chaar phul chaDha diye jo kisi ne mere mazar par

to hazaron charKH se bijliyan girin ek musht-e-ghubar par

wo mata-e-umr hai raegan jo na sarf ho dar-e-yar par

ki wo zindagi nahin zindagi jo basar ho roz-e-shumar par

na haram ke sajdon se wasta na sujud-e-dair se kuchh gharaz

mujhe kaam hai dar-e-yar se mujhe naz hai dar-e-yar par

main hamesha waqf-e-sitam raha mujhe faKHr hai mujhe naz hai

kabhi apni aisi hayat par kabhi aise lail-o-nahaar par

hai unhin ki zindagi zindagi hai unhin ki maut bhi maut jo

rahe aastana-e-yar par miTe aastana-e-yar par

wo bahaar-e-umr ho ya KHizan nahin koi qabil-e-e'tina

na yaqin tha mujh ko surur par na hai e'tibar KHumar par

wo hun rind-e-mai-kada-nosh main ki zara bhi der agar hui

to sharab shisha mein maujzan hui mere rang-e-KHumar par

main bhulaun kaise pas-e-fana meri zindagi ka hai aashna

ki tamam rahaten umr ki huin sadqe jab gham-e-yar par

na ghurur aish-e-jahan pe kar na gham-e-jahan se malul ho

ki nizam-e-dahr nahin raha kabhi 'afqar' ek madar par