ye na puchho kis tarah hasil hua kyun kar mila

ye na pūchho kis tarah hāsil huā kyuuñ kar milā

justujū kaam aa ga.ī merī to un kā dar milā

dil bhī miltā aur āñkheñ bhī to thā milne kā lutf

yuuñ to milne ke liye ye be-vafā aksar milā

husn vāloñ meñ thā jalva kis ke husn-e-pāk kā

jo milā 'umda milā achchhā milā behtar milā

shikva-e-be-dād kī himmat na mujh ko ho sakī

'arsa-e-mahshar meñ yuuñ vo fitna-e-mahshr milā

jām-e-sahbā ko hai shāyad jām-e-jam se kuchh lagāv

saare parde uTh ga.e mai-kash ko jab sāġhar milā

tuur kī 'azmat mire dil meñ samā.ī is qadar

apnā māthā rakh diyā jo raah meñ patthar milā

rakhte the dar-parda matlab milne vaale aap ke

kuchh milā tā-zindagī be-laus to 'afsar' milā

ye na puchho kis tarah hasil hua kyun kar mila

justuju kaam aa gai meri to un ka dar mila

dil bhi milta aur aankhen bhi to tha milne ka lutf

yun to milne ke liye ye be-wafa aksar mila

husn walon mein tha jalwa kis ke husn-e-pak ka

jo mila 'umda mila achchha mila behtar mila

shikwa-e-be-dad ki himmat na mujh ko ho saki

'arsa-e-mahshar mein yun wo fitna-e-mahshr mila

jam-e-sahba ko hai shayad jam-e-jam se kuchh lagaw

sare parde uTh gae mai-kash ko jab saghar mila

tur ki 'azmat mere dil mein samai is qadar

apna matha rakh diya jo rah mein patthar mila

rakhte the dar-parda matlab milne wale aap ke

kuchh mila ta-zindagi be-laus to 'afsar' mila