raha karata hai aksar tazkira barbaadi-e-dil ka

rahā karatā hai aksar tazkira barbādī-e-dil kā

maiñ bigḌā huuñ to afsāna banā huuñ un kī mahfil kā

nishāna ban gayā baiThe-biThā.e tīr-e-qātil kā

chalo chhuTTī huī jhagḌā miTā qissa gayā dil kā

qiyāmat kī kashish rakhte haiñ zarre ḳhaak sāhil ke

ki maujeñ āḳhirī dam tak bhī dam bhartī haiñ sāhil kā

thake-māñde musāfir aa paḌe ārām kī ḳhātir

baḌā ehsān hai in ġham-zadoñ par pahlī manzil kā

dil-e-majrūh apne zaḳhm par phāhā lagāne ko

kināra chāhtā hai dāman-e-shamshīr qātil kā

mirā dil TuuT jā.egā na khīñch us ko na khīñch us ko

tirā nāvik nahīñ zālim ye TukḌā hai mire dil kā

mire ahbāb ba.ad-e-marg is hairat se takte haiñ

ki jaise mere māthe par hai likhnā naam qātil kā

unheñ pardā nahīñ hai to na ho ye kaam un kā hai

hameñ to haal kah denā kabhī apnā kabhī dil kā

dil-e-mushtāq 'afsar' ko agar hairāñ banāyā hai

to rakheñ aap use ā.īna kar ke apnī mahfil kā

raha karata hai aksar tazkira barbaadi-e-dil ka

main bigDa hun to afsana bana hun un ki mahfil ka

nishana ban gaya baiThe-biThae tir-e-qatil ka

chalo chhuTTi hui jhagDa miTa qissa gaya dil ka

qiyamat ki kashish rakhte hain zarre KHak sahil ke

ki maujen aaKHiri dam tak bhi dam bharti hain sahil ka

thake-mande musafir aa paDe aaram ki KHatir

baDa ehsan hai in gham-zadon par pahli manzil ka

dil-e-majruh apne zaKHm par phaha lagane ko

kinara chahta hai daman-e-shamshir qatil ka

mera dil TuT jaega na khinch us ko na khinch us ko

tera nawik nahin zalim ye TukDa hai mere dil ka

mere ahbab baad-e-marg is hairat se takte hain

ki jaise mere mathe par hai likhna nam qatil ka

unhen parda nahin hai to na ho ye kaam un ka hai

hamein to haal kah dena kabhi apna kabhi dil ka

dil-e-mushtaq 'afsar' ko agar hairan banaya hai

to rakhen aap use aaina kar ke apni mahfil ka