be-shumar insan hain sab ka sarapa ek hai

be-shumār insān haiñ sab kā sarāpā ek hai

sab ke ḳhāl-o-ḳhad judā haiñ aur chehra ek hai

be-hisāb uslūb haiñ iz.hār-e-matlab ke magar

aañkh se girte hue ashkoñ kā lahja ek hai

āḳhirī sachchā.ī kī manzil hai sab ke sāmne

sab kī rāheñ muḳhtalif haiñ sab kā jazba ek hai

maiñ ne maazī aur mustaqbil kī sadiyāñ chhān liiñ

maiñ ne dekhā vaqt ke kiise meñ lamha ek hai

'adl kar aulād-e-ādam ke muqaddar 'adl kar

tishna-lab lākhoñ karoḌoñ aur dariyā ek hai

vus'at-e-'ālam meñ mānind-e-lahad ubhrā huā

justujū ke bahr-e-zulmat meñ jazīra ek hai

sab ke sab faanī haiñ baaqī hai faqat zāt-e-ḳhudā

qātil-o-maqtūl kī qabroñ pe katba ek hai

pyaar se qaa.im hai taḳhlīq-e-do-'ālam kā bharam

is shajar kī an-ginat shāḳheñ haiñ pattā ek hai

jitne chehre haiñ vo ik chehre kā 'aks-o-naqsh haiñ

yuuñ to rishte saikḌoñ haiñ asl rishta ek hai

kyā batā.ūñ kaun sī taḳhsīs mujh ko bhā ga.ī

yuuñ to apne haiñ sab insāñ merā apnā ek hai

kitnī vahdat hai sadāoñ ke tanavvo' meñ 'nadīm'

saaz sab ke apne-apne sab kā naġhma ek hai

be-shumar insan hain sab ka sarapa ek hai

sab ke KHal-o-KHad juda hain aur chehra ek hai

be-hisab uslub hain izhaar-e-matlab ke magar

aankh se girte hue ashkon ka lahja ek hai

aaKHiri sachchai ki manzil hai sab ke samne

sab ki rahen muKHtalif hain sab ka jazba ek hai

main ne mazi aur mustaqbil ki sadiyan chhan lin

main ne dekha waqt ke kise mein lamha ek hai

'adl kar aulad-e-adam ke muqaddar 'adl kar

tishna-lab lakhon karoDon aur dariya ek hai

wus'at-e-'alam mein manind-e-lahad ubhra hua

justuju ke bahr-e-zulmat mein jazira ek hai

sab ke sab fani hain baqi hai faqat zat-e-KHuda

qatil-o-maqtul ki qabron pe katba ek hai

pyar se qaim hai taKHliq-e-do-'alam ka bharam

is shajar ki an-ginat shaKHen hain patta ek hai

jitne chehre hain wo ek chehre ka 'aks-o-naqsh hain

yun to rishte saikDon hain asl rishta ek hai

kya bataun kaun si taKHsis mujh ko bha gai

yun to apne hain sab insan mera apna ek hai

kitni wahdat hai sadaon ke tanawwo' mein 'nadim'

saz sab ke apne-apne sab ka naghma ek hai