duniya hai ek dasht to gulzar aap hain

duniyā hai ek dasht to gulzār aap haiñ

us tīrgī meñ matla’-e-anvār aap haiñ

ye bhī hai sach ki aap kī guftār hai jamīl

ye bhī hai haq ki sāhib-e-kirdār aap haiñ

ho laakh āftāb-e-qayāmat kī dhuup tez

mere liye to sāya-e-dīvār aap haiñ

ye faḳhr kam nahīñ ki maiñ huuñ jis kī gard-e-rah

us qāfile ke qāfila-sālār aap haiñ

darbār-e-shah meñ bhī maiñ agar sar-kashīda huuñ

us kā ye sabab mirā pindār aap haiñ

mujh ko kisī se hājat-e-chāra-garī nahīñ

har ġham mujhe 'azīz ki ġham-ḳhvār aap haiñ

mujh par ba-jurm-e-ġhurbat-o-dāman-darīdgī

sab log ḳhanda-zan haiñ to gul-bār aap haiñ

hai mere lafz-lafz meñ gar husn-o-dil-kashī

us kā ye raaz hai mirā me'yār aap haiñ

insān māl-o-zar ke junūñ meñ haiñ mubtalā

us hashr meñ 'nadīm' ko darkār aap haiñ

duniya hai ek dasht to gulzar aap hain

us tirgi mein matla’-e-anwar aap hain

ye bhi hai sach ki aap ki guftar hai jamil

ye bhi hai haq ki sahib-e-kirdar aap hain

ho lakh aaftab-e-qayamat ki dhup tez

mere liye to saya-e-diwar aap hain

ye faKHr kam nahin ki main hun jis ki gard-e-rah

us qafile ke qafila-salar aap hain

darbar-e-shah mein bhi main agar sar-kashida hun

us ka ye sabab mera pindar aap hain

mujh ko kisi se hajat-e-chaara-gari nahin

har gham mujhe 'aziz ki gham-KHwar aap hain

mujh par ba-jurm-e-ghurbat-o-daman-daridgi

sab log KHanda-zan hain to gul-bar aap hain

hai mere lafz-lafz mein gar husn-o-dil-kashi

us ka ye raaz hai mera me'yar aap hain

insan mal-o-zar ke junun mein hain mubtala

us hashr mein 'nadim' ko darkar aap hain