puchha jo kisi ne ahqar se kyun shaghl-e-suKHan ko chhoD diya

pūchhā jo kisī ne 'ahqar' se kyuuñ shaġhl-e-suḳhan ko chhoḌ diyā

bole ki gayā jab mausam-e-gul bulbul ne chaman ko chhoḌ diyā

chauñke na kisī din ḳhvāb se ham ġhaflat meñ basar kī umr apnī

ai vā-e-ġhazab kab aañkh khulī jab ruuh ne tan ko chhoḌ diyā

jab bāġh-e-jināñ meñ bū terī ai raunaq-e-gulshan phail ga.ī

bulbul ne guloñ se muñh moḌā phūloñ ne chaman ko chhoḌ diyā

ai hubb-e-vatan allāh se Dar bhūlī huī bāteñ yaad na kar

ab terī balā se bū meñ base jab tū ne chaman ko chhoḌ diyā

aa.e haiñ ajab andāz se vo Daale hue ruḳh par bāloñ ko

zulfeñ jo haTe.īñ ik shor huā sūraj ne gahan ko chhoḌ diyā

ab aañkh kisī par kyā Dāleñ jañchtā hī nahīñ nazroñ meñ koī

āñkhoñ pe tirī sadqa kar ke jañgal meñ hiran ko chhoḌ diyā

puchha jo kisi ne 'ahqar' se kyun shaghl-e-suKHan ko chhoD diya

bole ki gaya jab mausam-e-gul bulbul ne chaman ko chhoD diya

chaunke na kisi din KHwab se hum ghaflat mein basar ki umr apnī

ai wa-e-ghazab kab aankh khuli jab ruh ne tan ko chhoD diya

jab bagh-e-jinan mein bu teri ai raunaq-e-gulshan phail gai

bulbul ne gulon se munh moDa phulon ne chaman ko chhoD diya

ai hubb-e-watan allah se Dar bhuli hui baaten yaad na kar

ab teri bala se bu mein base jab tu ne chaman ko chhoD diya

aae hain ajab andaz se wo Dale hue ruKH par baalon ko

zulfen jo haTein ek shor hua suraj ne gahan ko chhoD diya

ab aankh kisi par kya Dalen janchta hi nahin nazron mein koi

aankhon pe teri sadqa kar ke jangal mein hiran ko chhoD diya