پوچھا جو کسی نے احقرؔ سے کیوں شغل سخن کو چھوڑ دیا

پوچھا جو کسی نے احقرؔ سے کیوں شغل سخن کو چھوڑ دیا

بولے کہ گیا جب موسم گل بلبل نے چمن کو چھوڑ دیا

چونکے نہ کسی دن خواب سے ہم غفلت میں بسر کی عمر اپنی

اے وائے غضب کب آنکھ کھلی جب روح نے تن کو چھوڑ دیا

جب باغ جناں میں بو تیری اے رونق گلشن پھیل گئی

بلبل نے گلوں سے منہ موڑا پھولوں نے چمن کو چھوڑ دیا

اے حب وطن اللہ سے ڈر بھولی ہوئی باتیں یاد نہ کر

اب تیری بلا سے بو میں بسے جب تو نے چمن کو چھوڑ دیا

آئے ہیں عجب انداز سے وہ ڈالے ہوئے رخ پر بالوں کو

زلفیں جو ہٹیں اک شور ہوا سورج نے گہن کو چھوڑ دیا

اب آنکھ کسی پر کیا ڈالیں جنچتا ہی نہیں نظروں میں کوئی

آنکھوں پہ تری صدقہ کر کے جنگل میں ہرن کو چھوڑ دیا