mohabbat se kyun ji bura hai kisi ka

mohabbat se kyuuñ jī burā hai kisī kā

kabhī koī shikva sunā hai kisī kā

butoñ par kareñ saikḌoñ dil tasadduq

kuchh us se sivā hauslā hai kisī kā

ġhazab hai na merī sune ek din bhī

vahī dil ki jo mubtalā hai kisī kā

shab-e-ġham meñ aksar mulāqāt kī hai

tasavvur hameñ bhī rahā hai kisī kā

paḌā rahne do apne dāman meñ dhabbā

na dho.o ye ḳhūn-e-vafā hai kisī kā

kahe dete haiñ shoḳh-e-chitvan ke tevar

mirā dost dushman banā hai kisī kā

ham ai charḳh kyā tujh se ummīd rakkheñ

koī kaam tū ne kiyā hai kisī kā

sitam par sitam hai jafā par jafā hai

tumheñ ḳhaak pās-e-vafā hai kisī kā

magar aarzū koī kushta huī hai

ye kyuuñ dil meñ ronā paḌā hai kisī kā

shab-e-vasl rah jaa.eñ armān baaqī

magar ham ko pās-e-hayā hai kisī kā

ab 'ehsān' milne kī ummīd rakkho

dil-e-zār nāseh banā hai kisī kā

mohabbat se kyun ji bura hai kisi ka

kabhi koi shikwa suna hai kisi ka

buton par karen saikDon dil tasadduq

kuchh us se siwa hausla hai kisi ka

ghazab hai na meri sune ek din bhi

wahi dil ki jo mubtala hai kisi ka

shab-e-gham mein aksar mulaqat ki hai

tasawwur hamein bhi raha hai kisi ka

paDa rahne do apne daman mein dhabba

na dhoo ye KHun-e-wafa hai kisi ka

kahe dete hain shoKH-e-chitwan ke tewar

mera dost dushman bana hai kisi ka

hum ai charKH kya tujh se ummid rakkhen

koi kaam tu ne kiya hai kisi ka

sitam par sitam hai jafa par jafa hai

tumhein KHak pas-e-wafa hai kisi ka

magar aarzu koi kushta hui hai

ye kyun dil mein rona paDa hai kisi ka

shab-e-wasl rah jaen arman baqi

magar hum ko pas-e-haya hai kisi ka

ab 'ehsan' milne ki ummid rakkho

dil-e-zar naseh bana hai kisi ka