ai rashk-e-qamar aage tere shams-o-qamar kya

ai rashk-e-qamar aage tire shams-o-qamar kyā

sau jaañ se fidā huuñ maiñ ye hai jān-o-jigar kyā

ik aan meñ dete ho jilā ishq ke maare

in bātoñ se thī īsā-e-mariyam ko ḳhabar kyā

ġhairat meñ mohabbat meñ muravvat meñ tirā misl

paayā nahīñ ham ne kahīñ aur hogā bashar kyā

din-bhar hai tasavvur hai magar raat ko ronā

karte haiñ miyāñ dekhiye ye dīda-e-tar kyā

ham tum haiñ dil-o-jāñ se agar ek hī 'mardāñ'

kahne ko haiñ vo ek haiñ ham do haiñ magar kyā

ai rashk-e-qamar aage tere shams-o-qamar kya

sau jaan se fida hun main ye hai jaan-o-jigar kya

ek aan mein dete ho jila ishq ke mare

in baaton se thi isa-e-mariyam ko KHabar kya

ghairat mein mohabbat mein murawwat mein tera misl

paya nahin hum ne kahin aur hoga bashar kya

din-bhar hai tasawwur hai magar raat ko rona

karte hain miyan dekhiye ye dida-e-tar kya

hum tum hain dil-o-jaan se agar ek hi 'mardan'

kahne ko hain wo ek hain hum do hain magar kya