اے رشک قمر آگے ترے شمس و قمر کیا

اے رشک قمر آگے ترے شمس و قمر کیا

سو جاں سے فدا ہوں میں یہ ہے جان و جگر کیا

اک آن میں دیتے ہو جلا عشق کے مارے

ان باتوں سے تھی عیسٰے مریم کو خبر کیا

غیرت میں محبت میں مروت میں ترا مثل

پایا نہیں ہم نے کہیں اور ہوگا بشر کیا

دن بھر ہے تصور ہے مگر رات کو رونا

کرتے ہیں میاں دیکھیے یہ دیدۂ تر کیا

ہم تم ہیں دل و جاں سے اگر ایک ہی مرداںؔ

کہنے کو ہیں وہ ایک ہیں ہم دو ہیں مگر کیا