ajib ishq ka donon taraf asar phaila

ajiib ishq kā donoñ taraf asar phailā

ye kah rahī hai anal-qais vo anā-lailā

kashish dikhā.ī ye majnūñ ke ishq-e-kāmil ne

udhar ḳhayāl chalā aur idhar chalī lailā

kamāl-e-ishq ne pahuñchā diyā kahāñ us ko

tavāf karatā hai majnūñ kā nāqa-e-lailā

siyāh-posh jo ka.aba ko qais ne dekhā

ye be-qarār huā chīñḳh uThā ki yā lailā

kise firāq ki majnūñ hai aur a.alam meñ

jidhar nigāh phiri sāmne huī lailā

lagī hai donoñ taraf laag ishq kī yaksāñ

zabāñ par us ke bhī majnūñ hai us ke bhī lailā

tamām ho ga.ī do din meñ umr-e-gul afsos

abhī to rañg-e-qabā tak nahīñ huā mailā

ḳhudā ke vāste chhoḌ 'akbar' in butoñ kā saath

ki in kā muñh hai bahut saaf dil bahut mailā

ajib ishq ka donon taraf asar phaila

ye kah rahi hai anal-qais wo ana-laila

kashish dikhai ye majnun ke ishq-e-kaamil ne

udhar KHayal chala aur idhar chali laila

kamal-e-ishq ne pahuncha diya kahan us ko

tawaf karata hai majnun ka naqa-e-laila

siyah-posh jo kaba ko qais ne dekha

ye be-qarar hua chinKH uTha ki ya laila

kise firaq ki majnun hai aur aalam mein

jidhar nigah phiri samne hui laila

lagi hai donon taraf lag ishq ki yaksan

zaban par us ke bhi majnun hai us ke bhi laila

tamam ho gai do din mein umr-e-gul afsos

abhi to rang-e-qaba tak nahin hua maila

KHuda ke waste chhoD 'akbar' in buton ka sath

ki in ka munh hai bahut saf dil bahut maila