wo soz hi baqi na raha qalb-o-jigar mein

vo soz hī baaqī na rahā qalb-o-jigar meñ

kis tarh du'ā Duub ke phir nikle asar meñ

mil jā.eñgī manzil mujhe naqsh-e-kaf-e-pā se

ye soch ke ābād huuñ tirī rāh-e-guzar meñ

kis tarh se tai hogī mirī manzil-e-āḳhir

kuchh bhī to nahīñ paas mire zād-e-safar meñ

be-ḳhud huā jis ne bhī nazar mujh se milā.ī

kyā baat hai saaqī tirī maḳhmūr nazar meñ

baḌh kar mah-o-anjum se bhī chamke vahī aañsū

jo dil se umañD aa.e mire dīda-e-tar meñ

vo zulm bhī karte haiñ to hai maslahat un kī

aur merī mohabbat hai fareb un kī nazar meñ

har ḳhaak ke zarra meñ nihāñ us kā hai jalva

phir bhī na nazar aa.e to ḳhāmī hai nazar meñ

uTh jaa.eñ hijābāt-e-duī jis kī nazar se

yaksāñ haram-o-dair haiñ phir us kī nazar meñ

vo 'arz-e-tamannā pe to braham hue aksar

ham un ko basā.e hī rahe qalb-o-jigar meñ

vo merī vafā par to haiñ mashkūk bahut kuchh

lekin sitam apne nahīñ kuchh un kī nazar meñ

kyūñ-kar na chaleñ shaiḳh-e-haram yaañ ba-sar-o-chashm

karte haiñ malak sajda tirī rāh-e-guzar meñ

kam-mā.igī-e-hashr kā ehsān hai jin ko

vo daulat-e-duniyā ko nahīñ laa.e nazar meñ

hai shart 'aqīde kī rah-e-'ishq meñ 'aḳhtar'

kā'ba meñ hai kuchh aur na but-ḳhāna ke dar meñ

wo soz hi baqi na raha qalb-o-jigar mein

kis tarh du'a Dub ke phir nikle asar mein

mil jaengi manzil mujhe naqsh-e-kaf-e-pa se

ye soch ke aabaad hun teri rah-e-guzar mein

kis tarh se tai hogi meri manzil-e-aKHir

kuchh bhi to nahin pas mere zad-e-safar mein

be-KHud hua jis ne bhi nazar mujh se milai

kya baat hai saqi teri maKHmur nazar mein

baDh kar mah-o-anjum se bhi chamke wahi aansu

jo dil se umanD aae mere dida-e-tar mein

wo zulm bhi karte hain to hai maslahat un ki

aur meri mohabbat hai fareb un ki nazar mein

har KHak ke zarra mein nihan us ka hai jalwa

phir bhi na nazar aae to KHami hai nazar mein

uTh jaen hijabaat-e-dui jis ki nazar se

yaksan haram-o-dair hain phir us ki nazar mein

wo 'arz-e-tamanna pe to braham hue aksar

hum un ko basae hi rahe qalb-o-jigar mein

wo meri wafa par to hain mashkuk bahut kuchh

lekin sitam apne nahin kuchh un ki nazar mein

kyun-kar na chalen shaiKH-e-haram yan ba-sar-o-chashm

karte hain malak sajda teri rah-e-guzar mein

kam-maigi-e-hashr ka ehsan hai jin ko

wo daulat-e-duniya ko nahin lae nazar mein

hai shart 'aqide ki rah-e-'ishq mein 'aKHtar'

ka'ba mein hai kuchh aur na but-KHana ke dar mein