pi chuke hain le ke chashm-e-yar se paimana hum

pī chuke haiñ le ke chashm-e-yār se paimāna ham

thāmnā lenā gire ai laġhzish-e-mastāna ham

hasb-e-mauqa jānte haiñ masraf-e-mai-kHān ham

shīsha jab TuuTā banāte haiñ use paimāna ham

josh-e-vahshat vahshiyoñ ko ho to sunvā.eñ tumheñ

chāk-e-dāman se sadā-e-nā'ra-e-mastāna ham

sar-guzisht-e-ishq apnī hai jahāñ meñ yād-gār

ahl-e-a.alam kī zabāñ par ban ga.e afsāna ham

is taraf zarf-e-vazū hai us taraf jām-e-subū

jaa.eñ masjid ko ilāhī yā suu.ye mai-ḳhāna ham

paaye maalī se zamāne ke na yuuñ bhī bach sake

haiñ alag sab se misāl-e-sabza-e-be-gāna ham

de diyā dil ho gayā ahd-e-vafā jhagḌā chukā

aap is meñ ab kareñ kuchh hujjat-e-bejā na ham

kuchh hai yārāñ tarīqat ko ḳhabar bhī yā nahīñ

kar chuke haiñ tark 'aḳhtar' mashrab-e-rindāna ham

pi chuke hain le ke chashm-e-yar se paimana hum

thamna lena gire ai laghzish-e-mastana hum

hasb-e-mauqa jaante hain masraf-e-mai-kHan hum

shisha jab TuTa banate hain use paimana hum

josh-e-wahshat wahshiyon ko ho to sunwaen tumhein

chaak-e-daman se sada-e-na'ra-e-mastana hum

sar-guzisht-e-ishq apni hai jahan mein yaad-gar

ahl-e-alam ki zaban par ban gae afsana hum

is taraf zarf-e-wazu hai us taraf jam-e-subu

jaen masjid ko ilahi ya suye mai-KHana hum

paye mali se zamane ke na yun bhi bach sake

hain alag sab se misal-e-sabza-e-be-gana hum

de diya dil ho gaya ahd-e-wafa jhagDa chuka

aap is mein ab karen kuchh hujjat-e-beja na hum

kuchh hai yaran tariqat ko KHabar bhi ya nahin

kar chuke hain tark 'aKHtar' mashrab-e-rindana hum