پی چکے ہیں لے کے چشم یار سے پیمانہ ہم

پی چکے ہیں لے کے چشم یار سے پیمانہ ہم

تھامنا لینا گرے اے لغزش مستانہ ہم

حسب موقع جانتے ہیں مصرف میخانہ ہم

شیشہ جب ٹوٹا بناتے ہیں اسے پیمانہ ہم

جوش وحشت وحشیوں کو ہو تو سنوائیں تمہیں

چاک دامن سے صدائے نعرۂ مستانہ ہم

سر گزشت عشق اپنی ہے جہاں میں یاد گار

اہل عالم کی زباں پر بن گئے افسانہ ہم

اس طرف ظرف وضو ہے اس طرف جام سبو

جائیں مسجد کو الٰہی یا سوئے مے خانہ ہم

پائے مالی سے زمانے کے نہ یوں بھی بچ سکے

ہیں الگ سب سے مثال سبزۂ بیگانہ ہم

دے دیا دل ہو گیا عہد وفا جھگڑا چکا

آپ اس میں اب کریں کچھ حجت بیجا نہ ہم

کچھ ہے یاراں طریقت کو خبر بھی یا نہیں

کر چکے ہیں ترک اخترؔ مشرب رندانہ ہم