chunin hairat-zada hastam jahan kaisa makan kaisa

chunīñ hairat-zada hastam jahāñ kaisā makāñ kaisā

ki misl-e-ātish-e-sozāñ mirā soz-e-nihāñ kaisā

na ḳhāk-e-āstāñ huuñ maiñ na gardūñ kā makīñ Thahrā

rahūñ parvāz meñ har dam ye merā āshiyāñ kaisā

agar faanī huuñ maiñ phir kyuuñ ye hañgāma bapā har sū

vagar baaqī huuñ phir ye shor faanī kā bayāñ kaisā

ḳhayāl-o-vahm ke nāzuk gumāñ meñ Dūbtā huuñ maiñ

ki maiñ hastam nahīñ hastam ye merā imtihāñ kaisā

ba-sad hasrat sitam-gāh-e-zamāna dekhtā huuñ maiñ

ki har jānib fareb-e-ārzū hai ye samāñ kaisā

gumāñ kī talḳhiyāñ lekar yaqīñ ke dar pe aayā huuñ

nahīñ jo kuchh nazar aatā ye merā āsmāñ kaisā

tamannā kī tapish meñ bhī na ThanDī ho sakī hastī

ye ātish meñ jalā dil aur phir bhī be-dhuāñ kaisā

jahāñ nāzāñ hai hastī par ye hastī hai fareb āḳhir

kamāl-e-bandagī ‘naushā’ 'adam meñ hai nihāñ kaisā

chunin hairat-zada hastam jahan kaisa makan kaisa

ki misl-e-atish-e-sozan mera soz-e-nihan kaisa

na KHak-e-astan hun main na gardun ka makin Thahra

rahun parwaz mein har dam ye mera aashiyan kaisa

agar fani hun main phir kyun ye hangama bapa har su

wagar baqi hun phir ye shor fani ka bayan kaisa

KHayal-o-wahm ke nazuk guman mein Dubta hun main

ki main hastam nahin hastam ye mera imtihan kaisa

ba-sad hasrat sitam-gah-e-zamana dekhta hun main

ki har jaanib fareb-e-arzu hai ye saman kaisa

guman ki talKHiyan lekar yaqin ke dar pe aaya hun

nahin jo kuchh nazar aata ye mera aasman kaisa

tamanna ki tapish mein bhi na ThanDi ho saki hasti

ye aatish mein jala dil aur phir bhi be-dhuan kaisa

jahan nazan hai hasti par ye hasti hai fareb aaKHir

kamal-e-bandagi ‘nausha’ 'adam mein hai nihan kaisa