ye kis ki be-ruKHi hai kis ne chhina KHwab aankhon se

ye kis kī be-ruḳhī hai kis ne chhīnā ḳhvāb āñkhoñ se

kahāñ le jāoge yaaro mirā mahtāb āñkhoñ se

bujhī haiñ ārzūeñ bhī miTe haiñ naqsh rāhat ke

havā kyā le ga.ī āḳhir mire asbāb āñkhoñ se

mirī bedād kī gūñjeñ falak tak jā rahī haiñ kyuuñ

kahāñ tak ho sakegā zabt kā sailāb āñkhoñ se

tirī zulfoñ kī ḳhushbū thī yahī to rāz-e-hastī thā

vahī pal meñ bikhar kar chhin ga.ī nāyāb āñkhoñ se

ye kis kī yaad kā tūfāñ dil-e-vīrāñ meñ aayā hai

barastā hai 'ajab tūfāñ tirī mizrāb āñkhoñ se

miTā kar ḳhvāb bhī mere mirā 'unvāñ bhī le Daalā

magar kuchh miT nahīñ saktā mire ā’sāb āñkhoñ se

havā-e-dasht meñ bhaTkā kiye haiñ sāl-hā-sāloñ

magar chhupne lage haiñ ab vo sab asbāb āñkhoñ se

mujhe mansūr kar de yā 'atā kar diid kā lamha

ki ab uThne lagā hai parda-e-mizrāb āñkhoñ se

tirī bāteñ thiiñ jin se jaañ meñ aatī thī harārat sī

vo sab alfāz ab ruḳhsat hue be-tāb āñkhoñ se

ḳhud apnī justujū meñ maiñ bahut rusvā huā ākHir

yaqīñ jo thā kabhī vo ho gayā nāyāb āñkhoñ se

savāl-e-dīd le kar maiñ tire dar par paḌā huuñ bas

uThā de ab to parda mat girā mehrāb āñkhoñ se

tirī furqat meñ dekhī hai sahar bhī maiñ ne ḳhālī sī

ki jaise chhin gayā ho maah kā shādāb āñkhoñ se

tirī ulfat meñ jo naqshe the dil par sabt nausha ke

vo sab miTne lage āḳhir hue nāyāb āñkhoñ se

ye kis ki be-ruKHi hai kis ne chhina KHwab aankhon se

kahan le jaoge yaro mera mahtab aankhon se

bujhi hain aarzuen bhi miTe hain naqsh rahat ke

hawa kya le gai aaKHir mere asbab aankhon se

meri bedad ki gunjen falak tak ja rahi hain kyun

kahan tak ho sakega zabt ka sailab aankhon se

teri zulfon ki KHushbu thi yahi to raaz-e-hasti tha

wahi pal mein bikhar kar chhin gai nayab aankhon se

ye kis ki yaad ka tufan dil-e-viran mein aaya hai

barasta hai 'ajab tufan teri mizrab aankhon se

miTa kar KHwab bhi mere mera 'unwan bhi le Dala

magar kuchh miT nahin sakta mere aa’sab aankhon se

hawa-e-dasht mein bhaTka kiye hain sal-ha-salon

magar chhupne lage hain ab wo sab asbab aankhon se

mujhe mansur kar de ya 'ata kar did ka lamha

ki ab uThne laga hai parda-e-mizrab aankhon se

teri baaten thin jin se jaan mein aati thi hararat si

wo sab alfaz ab ruKHsat hue be-tab aankhon se

KHud apni justuju mein main bahut ruswa hua aakHir

yaqin jo tha kabhi wo ho gaya nayab aankhon se

sawal-e-did le kar main tere dar par paDa hun bas

uTha de ab to parda mat gira mehrab aankhon se

teri furqat mein dekhi hai sahar bhi main ne KHali si

ki jaise chhin gaya ho mah ka shadab aankhon se

teri ulfat mein jo naqshe the dil par sabt nausha ke

wo sab miTne lage aaKHir hue nayab aankhon se