chashm-e-jaanan hai shabih-e-chashm-e-ahu hu-ba-hu

chashm-e-jānāñ hai shabīh-e-chashm-e-āhū hū-ba-hū

’ambarīñ haiñ kākul-e-shab-rañg ke mū mū-ba-mū

mast hogā ek 'ālam misl āhū-e-ḳhutan

ai sabā mat kar pareshāñ bū-e-gesū sū-ba-sū

'ishq sarv-e-qadd-e-jānāñ meñ hai 'āshiq kā ye rañg

kar rahā hai fāḳhta kī misl kū-kū kū-ba-kū

qatl kā gar hai irāda der kyuuñ karte haiñ aap

dekhiye maujūd hai ye teġh-e-abrū rū-ba-rū

'ashrafī' allāh samjhe in butoñ ke zulm se

aañkh dikhlāne hī meñ karte haiñ jaadū dū-ba-dū

chashm-e-jaanan hai shabih-e-chashm-e-ahu hu-ba-hu

’ambarin hain kakul-e-shab-rang ke mu mu-ba-mu

mast hoga ek 'alam misl aahu-e-KHutan

ai saba mat kar pareshan bu-e-gesu su-ba-su

'ishq sarw-e-qadd-e-jaanan mein hai 'ashiq ka ye rang

kar raha hai faKHta ki misl ku-ku ku-ba-ku

qatl ka gar hai irada der kyun karte hain aap

dekhiye maujud hai ye tegh-e-abru ru-ba-ru

'ashrafi' allah samjhe in buton ke zulm se

aankh dikhlane hi mein karte hain jadu du-ba-du