چشم جاناں ہے شبیہ چشم آہو ہو بہ ہو

چشم جاناں ہے شبیہ چشم آہو ہو بہ ہو

عنبریں ہیں کاکل شب رنگ کے مو مو بہ مو

مست ہوگا ایک عالم مثل آہوئے ختن

اے صبا مت کر پریشاں بوئے گیسو سو بہ سو

عشق سرو قد جاناں میں ہے عاشق کا یہ رنگ

کر رہا ہے فاختہ کی مثل کو‌ کو کو بہ کو

قتل کا گر ہے ارادہ دیر کیوں کرتے ہیں آپ

دیکھیے موجود ہے یہ تیغ ابرو روبرو

اشرفیؔ اللہ سمجھے ان بتوں کے ظلم سے

آنکھ دکھلانے ہی میں کرتے ہیں جادو دو بہ دو