وہ ترا جمال خدا نما جو خدا خدا نظر آ گیا

وہ ترا جمال خدا نما جو خدا خدا نظر آ گیا

بخدا خدا نظر آ گیا بخدا خدا نظر آ گیا

جو فنا کے بعد بقا ہوئی تری ذات جلوہ نما ہوئی

یہ وجود فانی سربسر مجھے شکل لانظر آ گیا

جسے غیر کہتے تھے ہی خدا نہ وجود اس کا کہیں ملا

اسی اپنی صورت و شکل میں وہ مرا خدا نظر آ گیا

کہوں کیا کہ کون ہوں کون جو کہوں کہ میں ہوں نہ میں ہوں میں

یہ سمجھ میں آیا کہ توہے تو جو حجاب وا نظر آ گیا

وہی ایک مہر منیر ہے وہی آپ اپنا نظیر ہے

وہ ہر ایک شکل میں جلوہ گر مجھے خود نما نظر آ گیا

یہی اہل راز کی بات ہے کہ نہیں سوائے ظہور حق

اسے خود نمائی کا شوق تھا جو یہ ماسوا نظر آ گیا

جسے لوگ کہتے تھے اشرفیؔ اسے چشم غور سے دیکھ کر

لگے کہنے اہل نظر یہی کہ یہ کیا تھا کیا نظر آ گیا