qafila arman-o-hasrat ka hamare dil mein hai

qāfila armān-o-hasrat kā hamāre dil meñ hai

jab se is manzil meñ aayā hai isī manzil meñ hai

aarzū vo hogī puurī jo dil-e-bismil meñ hai

āstīneñ chaḌh chukīñ ḳhanjar kaf-e-qātil meñ hai

ho gayā zaa.il asar kyā inqalāb-e-ishq kā

aarzū jo dil meñ mere thī vo ab tak dil meñ hai

jaan par ab hai nazar pahle thī dil par hī nigāh

pahle dil mushkil meñ thā ab jaan bhī mushkil meñ hai

jo charāġh-e-ka.aba-o-but-ḳhāna se kuchh kam nahīñ

vo munavvar dāġh-e-ulfat kā hamāre dil meñ hai

dam kabhī uljhe hujūm-e-ġham se ye mumkin nahīñ

ai ḳhayāl-e-yār jab tak tū hamāre dil meñ hai

dekh le qātil nigāh-e-nāz se phir is taraf

ik zarā sā dam abhī baaqī tan-e-bismil meñ hai

aap agar us ko nikāleñ to ināyat aap kī

aarzū machlī huī baiThī hamāre dil meñ hai

saaf bātin ham se baḌh kar koī ai ‘biryāñ’ nahīñ

vo zabāñ se bhī nikaltā hai jo apne dil meñ hai

qafila arman-o-hasrat ka hamare dil mein hai

jab se is manzil mein aaya hai isi manzil mein hai

aarzu wo hogi puri jo dil-e-bismil mein hai

aastinen chaDh chukin KHanjar kaf-e-qatil mein hai

ho gaya zail asar kya inqalab-e-ishq ka

aarzu jo dil mein mere thi wo ab tak dil mein hai

jaan par ab hai nazar pahle thi dil par hi nigah

pahle dil mushkil mein tha ab jaan bhi mushkil mein hai

jo charagh-e-kaba-o-but-KHana se kuchh kam nahin

wo munawwar dagh-e-ulfat ka hamare dil mein hai

dam kabhi uljhe hujum-e-gham se ye mumkin nahin

ai KHayal-e-yar jab tak tu hamare dil mein hai

dekh le qatil nigah-e-naz se phir is taraf

ek zara sa dam abhi baqi tan-e-bismil mein hai

aap agar us ko nikalen to inayat aap ki

aarzu machli hui baiThi hamare dil mein hai

saf baatin hum se baDh kar koi ai ‘biryan’ nahin

wo zaban se bhi nikalta hai jo apne dil mein hai