ghaur se mera junun-e-fitna-saman dekhiye

ġhaur se merā junūn-e-fitna-sāmāñ dekhiye

dūsrā bhī ik garebāñ meñ garebāñ dekhiye

maut bhī aatī nahii. vo shoḳh bhī miltā nahīñ

apnī mushkil kis tarah hotī hai āsāñ dekhiye

is qadr mashq-e-tasavvur kī zarūrat hai hameñ

har ghaḌī dil meñ kisī kā rū-e-tābāñ dekhiye

khīñch kar laa.ī adam se mujh ko duniyā kī taraf

ab kahāñ le jaaye ye umr-e-gurezāñ dekhiye

chashm-poshī tālib-e-dīdār se achchhī nahīñ

dil meñ rah jā.egā ghuT ke dil kā armāñ dekhiye

dast-e-vahshat ne kiyā donoñ ko kaisā tār-tār

merā dāman dekhiye merā garebāñ dekhiye

dekhte haiñ aap kyā ḳhush ho ke phūloñ kī bahār

dekhnā hai to hamāre zaḳhm-e-ḳhandāñ dekhiye

mil ga.e sab ḳhaak meñ ik roz ham bhī hoñge ḳhaak

is nazar se jānib-e-shahar-e-kHmoshāñ dekhiye

dil ko ḳhākistar karegā zabt-e-āh-e-ātishīñ

baaz us se aa.iye anjām 'biryāñ' dekhiye

ghaur se mera junun-e-fitna-saman dekhiye

dusra bhi ek gareban mein gareban dekhiye

maut bhi aati nahi wo shoKH bhi milta nahin

apni mushkil kis tarah hoti hai aasan dekhiye

is qadr mashq-e-tasawwur ki zarurat hai hamein

har ghaDi dil mein kisi ka ru-e-taban dekhiye

khinch kar lai adam se mujh ko duniya ki taraf

ab kahan le jaye ye umr-e-gurezan dekhiye

chashm-poshi talib-e-didar se achchhi nahin

dil mein rah jaega ghuT ke dil ka arman dekhiye

dast-e-wahshat ne kiya donon ko kaisa tar-tar

mera daman dekhiye mera gareban dekhiye

dekhte hain aap kya KHush ho ke phulon ki bahaar

dekhna hai to hamare zaKHm-e-KHandan dekhiye

mil gae sab KHak mein ek roz hum bhi honge KHak

is nazar se jaanib-e-shahar-e-kHmoshan dekhiye

dil ko KHakistar karega zabt-e-ah-e-atishin

baz us se aaiye anjam 'biryan' dekhiye