mujhe phir ek sitam-gar se mohabbat hoti jati hai

mujhe phir ik sitam-gar se mohabbat hotī jaatī hai

ilāhī din-ba-din kaisī tabī.at hotī jaatī hai

jafā.eñ ḳhatm ho jā.eñgī jab un kī to kyā hogā

ki mujh ko ranj-o-ġham sahne kī 'ādat hotī jaatī hai

utar kar rah ga.ī haiñ jab se nazreñ un kī siine meñ

mere zaḳhmoñ ko tīroñ se mohabbat hotī jaatī hai

vo buniyādeñ gulistānoñ kī rakh sakte haiñ paanī par

unheñ rote meñ hañs dene kī 'ādat hotī jaatī hai

mujhe 'altāf' rusvā kar diyā sahbā-parastī ne

javānī bhī mirī vaqf-e-musībat hotī jaatī hai

mujhe phir ek sitam-gar se mohabbat hoti jati hai

ilahi din-ba-din kaisi tabiat hoti jati hai

jafaen KHatm ho jaengi jab un ki to kya hoga

ki mujh ko ranj-o-gham sahne ki 'adat hoti jati hai

utar kar rah gai hain jab se nazren un ki sine mein

mere zaKHmon ko tiron se mohabbat hoti jati hai

wo buniyaaden gulistanon ki rakh sakte hain pani par

unhen rote mein hans dene ki 'adat hoti jati hai

mujhe 'altaf' ruswa kar diya sahba-parasti ne

jawani bhi meri waqf-e-musibat hoti jati hai