مجھے پھر اک ستم گر سے محبت ہوتی جاتی ہے

مجھے پھر اک ستم گر سے محبت ہوتی جاتی ہے

الٰہی دن بہ دن کیسی طبیعت ہوتی جاتی ہے

جفائیں ختم ہو جائیں گی جب ان کی تو کیا ہوگا

کہ مجھ کو رنج و غم سہنے کی عادت ہوتی جاتی ہے

اتر کر رہ گئی ہیں جب سے نظریں ان کی سینے میں

میرے زخموں کو تیروں سے محبت ہوتی جاتی ہے

وہ بنیادیں گلستانوں کی رکھ سکتے ہیں پانی پر

انہیں روتے میں ہنس دینے کی عادت ہوتی جاتی ہے

مجھے الطافؔ رسوا کر دیا صہبا پرستی نے

جوانی بھی مری وقف مصیبت ہوتی جاتی ہے