murid-e-dair-o-haram kam se kam ye kaam karen

murīd-e-dair-o-haram kam se kam ye kaam kareñ

hadīs-e-dard-e-mohabbat kā zauq aam kareñ

yahī hai minnat-e-ādam yahī muqaddar hai

ġhamoñ kī dhuup meñ rāhat kā ehtimām kareñ

abhī na deñ hameñ ilzām be-vafā.ī kā

ḳhud apne va.adoñ kā kahiye vo ehtirām kareñ

jo tishna kaam tire mai-kade meñ hoñ saaqī

mire lahū se vo labrez apne jaam kareñ

abhī na jaib na dāman na āstīñ kā patā

yaqīn mausam-e-gul ho to ehtimām kareñ

inhīñ ke lab pe hai amn-o-amāñ kā afsāna

vahī jo hazrat-e-insāñ kā qatl-e-ām kareñ

gumāñ se ahd-e-yaqīñ tak sukūñ kī ho duniyā

ḳhushī ke saath jo ġham kā bhī ehtirām kareñ

mazāq ahl-e-gulistāñ jo saath de jaa.e

qafas-nasīboñ kī yādoñ kā ehtirām kareñ

ye daur-e-hashr nahii. hai to aur kyā hai 'amīn'

kise pukāreñ yahāñ kis ko ham-kalām kareñ

murid-e-dair-o-haram kam se kam ye kaam karen

hadis-e-dard-e-mohabbat ka zauq aam karen

yahi hai minnat-e-adam yahi muqaddar hai

ghamon ki dhup mein rahat ka ehtimam karen

abhi na den hamein ilzam be-wafai ka

KHud apne wadon ka kahiye wo ehtiram karen

jo tishna kaam tere mai-kade mein hon saqi

mere lahu se wo labrez apne jam karen

abhi na jaib na daman na aastin ka pata

yaqin mausam-e-gul ho to ehtimam karen

inhin ke lab pe hai amn-o-aman ka afsana

wahi jo hazrat-e-insan ka qatl-e-am karen

guman se ahd-e-yaqin tak sukun ki ho duniya

KHushi ke sath jo gham ka bhi ehtiram karen

mazaq ahl-e-gulistan jo sath de jae

qafas-nasibon ki yaadon ka ehtiram karen

ye daur-e-hashr nahi hai to aur kya hai 'amin'

kise pukaren yahan kis ko ham-kalam karen