jahan par ishq hai wahan aql ko jaana nahin aata

jahāñ par 'ishq hai vahāñ 'aql ko jaanā nahīñ aatā

ye vo jā hai jahāñ se lauT kar aanā nahīñ aatā

use us rahmat-e-bārī kā bahlānā nahīñ aatā

jise ki naġhma-e-tauhīd kā gaanā nahīñ aatā

maqām-e-manzil-e-maqsūd koī pā nahīñ saktā

ki jis ko apnī hastī se guzar jaanā nahīñ aatā

ye vo kūcha hai jis meñ 'aql vaale luT ga.e lākhoñ

ulajhnā us meñ aisā hai ki suljhāna nahīñ aatā

vo kyā jaane namāz-e-'ishq kyā hai kis tarah hogī

tere naqsh-e-qadam pe jis ko jhuk jaanā nahīñ aatā

chaḌhā.egā vo kaise bāda-e-'irfāñ ke paimāne

jise ik jaam pī kar hosh meñ aanā nahīñ aatā

'amīr'-e-sābarī us kā sañvarnā ġhair mumkin hai

jise rāh-e-mohabbat meñ bigaḌ jaanā nahīñ aatā

jahan par 'ishq hai wahan 'aql ko jaana nahin aata

ye wo ja hai jahan se lauT kar aana nahin aata

use us rahmat-e-bari ka bahlana nahin aata

jise ki naghma-e-tauhid ka gana nahin aata

maqam-e-manzil-e-maqsud koi pa nahin sakta

ki jis ko apni hasti se guzar jaana nahin aata

ye wo kucha hai jis mein 'aql wale luT gae lakhon

ulajhna us mein aisa hai ki suljhana nahin aata

wo kya jaane namaz-e-'ishq kya hai kis tarah hogi

tere naqsh-e-qadam pe jis ko jhuk jaana nahin aata

chaDhaega wo kaise baada-e-'irfan ke paimane

jise ek jam pi kar hosh mein aana nahin aata

'amir'-e-sabari us ka sanwarna ghair mumkin hai

jise rah-e-mohabbat mein bigaD jaana nahin aata