جہاں پر عشق ہے وہاں عقل کو جانا نہیں آتا

جہاں پر عشق ہے وہاں عقل کو جانا نہیں آتا

یہ وہ جا ہے جہاں سے لوٹ کر آنا نہیں آتا

اسے اس رحمت باری کا بہلانا نہیں آتا

جسے کہ نغمۂ توحید کا گانا نہیں آتا

مقام منزل مقصود کوئی پا نہیں سکتا

کہ جس کو اپنی ہستی سے گزر جانا نہیں آتا

یہ وہ کوچہ ہے جس میں عقل والے لٹ گئے لاکھوں

الجھنا اس میں ایسا ہے کہ سلجھانا نہیں آتا

وہ کیا جانے نماز عشق کیا ہے کس طرح ہوگی

تیرے نقش قدم پہ جس کو جھک جانا نہیں آتا

چڑھائے گا وہ کیسے بادۂ عرفاں کے پیمانے

جسے اک جام پی کر ہوش میں آنا نہیں آتا

امیرؔ صابری اس کا سنورنا غیر ممکن ہے

جسے راہ محبت میں بگڑ جانا نہیں آتا