saqi ke aastan pe aaj rakh ke sar-e-niyaz dekh

saaqī ke āstāñ pe aaj rakh ke sar-e-niyāz dekh

āñkhoñ kā āñkheñ Daal gar jalva-e-be-niyāz dekh

dā'va-e-'ishq hai agar miT jā talāsh-e-yār meñ

chashm-e-haqīqat āshnā miTte haiñ jo hai raaz dekh

sadqa-e-nigāh-e-nāz kā bhiik hameñ bhī ho 'atā

kiije karam karam-navāz dast-e-talab-o-rāz dekh

dar pe tere lagā huā mastoñ kā aaj jamghaTā

sāqī-e-be-niyāz dekh sāqī-e-dil-navāz dekh

kaun hai aaj pī rahā aur pilā rahā hai kaun

’ālam-e-be-ḳhudī hai yuuñ kis ko hai imtiyāz dekh

parde tasavvurāt ke uThte hī un kī bazm meñ

hosh-o-havās-o-jān-o-dil kar diye vaqf-e-nāz dekh

merī 'amīr'-e-sābarī sadqe huī hai kā.ināt

aaj harīm-e-nāz meñ sābir piyā ke naaz dekh

saqi ke aastan pe aaj rakh ke sar-e-niyaz dekh

aankhon ka aankhen Dal gar jalwa-e-be-niyaz dekh

da'wa-e-'ishq hai agar miT ja talash-e-yar mein

chashm-e-haqiqat aashna miTte hain jo hai raaz dekh

sadqa-e-nigah-e-naz ka bhik hamein bhi ho 'ata

kije karam karam-nawaz dast-e-talab-o-raaz dekh

dar pe tere laga hua maston ka aaj jamghaTa

saqi-e-be-niyaz dekh saqi-e-dil-nawaz dekh

kaun hai aaj pi raha aur pila raha hai kaun

’alam-e-be-KHudi hai yun kis ko hai imtiyaz dekh

parde tasawwuraat ke uThte hi un ki bazm mein

hosh-o-hawas-o-jaan-o-dil kar diye waqf-e-naz dekh

meri 'amir'-e-sabari sadqe hui hai kainat

aaj harim-e-naz mein sabir piya ke naz dekh