KHat jo nikla bosa-e-rukHsar aasan ho gaya

ḳhat jo niklā bosa-e-rukHsār āsāñ ho gayā

kārvāñ aane se nirḳh-e-husn arzāñ ho gayā

kyā hamāre gor par hai ehtiyāj-e-raushnī

chaar jugnū jab chamak nikle charāġhāñ ho gayā

soz-e-ġham meñ kuchh na pūchho jild-e-tan kā mujh se haal

jal ke ye kāġhaz sharāroñ se charāġhāñ ho gayā

mere chashm-e-tar se ham-chashmī kā rakhtā thā ḳhayāl

pānī-pānī ye huā yā dil ki bārāñ ho gayā

dekh qātil apne dīvāne kā jazb-e-shauq-e-qatl

jab gale se mil gayā ḳhanjar garebāñ ho gayā

o kamāñ-dār is ko kahte haiñ hujūm-e-dard-o-ġham

tañgi-e-dil se simaT kar tīr-e-paikāñ ho gayā

āsiyā-e-chashm lailā ne ye piisā dasht meñ

bakHt-e-majnūñ surma-e-chashm-e-ġhazālāñ ho gayā

bosa-e-gesū pe us ne zab.h kar Daalā mujhe

ek kāfir ke liye ḳhūn-e-musalmāñ ho gayā

thā musalmāñ jab talak mushtāq kāfir thā vo but

ye huā kāfir to vo ziddī musalmāñ ho gayā

nāma-e-a’amāl hai jab tak nahīñ miltā 'amīr'

mere haath aayā ye aur merā garebāñ ho gayā

KHat jo nikla bosa-e-rukHsar aasan ho gaya

karwan aane se nirKH-e-husn arzan ho gaya

kya hamare gor par hai ehtiyaj-e-raushni

chaar jugnu jab chamak nikle charaghan ho gaya

soz-e-gham mein kuchh na puchho jild-e-tan ka mujh se haal

jal ke ye kaghaz shararon se charaghan ho gaya

mere chashm-e-tar se ham-chashmi ka rakhta tha KHayal

pani-pani ye hua ya dil ki baran ho gaya

dekh qatil apne diwane ka jazb-e-shauq-e-qatl

jab gale se mil gaya KHanjar gareban ho gaya

o kaman-dar is ko kahte hain hujum-e-dard-o-gham

tangi-e-dil se simaT kar tir-e-paikan ho gaya

aasiya-e-chashm laila ne ye pisa dasht mein

bakHt-e-majnun surma-e-chashm-e-ghazalan ho gaya

bosa-e-gesu pe us ne zabh kar Dala mujhe

ek kafir ke liye KHun-e-musalman ho gaya

tha musalman jab talak mushtaq kafir tha wo but

ye hua kafir to wo ziddi musalman ho gaya

nama-e-a’amal hai jab tak nahin milta 'amir'

mere hath aaya ye aur mera gareban ho gaya